Rannsókn á INTRUM á Íslandi. Annað væri óábyrgt.

Ef Norska fjármálaeftirlitið hefur rift starfsleyfi Intrum í Noregi, þá er það klárlega ábending á að full ástæða sé til að hefja rannsókn á starfsemi Intrum á Íslandi. Að það sé afar líklegt að hið sama sé upp á teningnum á Íslandi, -sem myndi staðfestast með viðeigandi rannsókn.

Ég bý nú ekki á landinu, en hef heyrt fullt af sögum af innheimtum og vöxtum út úr kú við alla sanngirni. Hef einu sinni fengið bréf frá þeim út af einhverri smáupphæð. Ég svaraði þeim um hæl og bað um frekari upplýsingar og nákvæmari upphæð. Þeir svöruðu mér ekkert og ég þekki svona vinnubrögð héðan úr USA, draga á langinn til að láta dagvexti hækka. Svo ég sendi þeim skammarbréf sem þeir svöruðu ekki einu sinni. Hæðnin var að titillinn á bréfinu hjá þeim var "ekki gera ekkert" já þetta er svoldið asnalegt. 

Einu sinni, fyrir um 15 árum síðan, komst ég í skuld vegna fjárhagskreppu, þegar ég var skuldugri en ég réð við vegna skilnaðar, atvinnuleysi í mínu fagi ofl. hér í Ameríku. Það lærðist mikið á þeim árum. Eitt sem ég lærði er að maður er fljótur að fara í mínus. Þarf alls ekki mikið út af að bera.

Annað sem ég lærði og komst á sterka skoðun með er að svona "collection agencies" eru upp til hópa aðilar sem ýtir fólki í fjárhagsneyð ennþá lengra niður. Bera oft litla sem enga virðingu fyrir fólki í fjárhagskröggum og  er afar forsdómafullt gagnvart því. Ég hef heyrt íslenskann rukkara segja mér persónulega að "mest af þessum skuldurum eru helvítis aumingjar." Svo tók ég mikið eftir hér í BNA að sumir rukkarar misnota stöðu sína til valdníðslu. Það er að senda hótunarbréf og hringir með yfirskyni lítilmagnans sem loksins fær vald til að hræða fólk, skamma, nuða í, hrekkja og láta svipusmelli heyrast. Sálfræðingur á kannski betri skýringu á hvað býr að baki svona hugarfari. Er á þeirri skoðun að svona "collections agencies" eigi stórann þátt í að viðhalda skuldugum í skuld. Auðvitað eru sumar stofnanir eðlilegar og auðvitað eru sumir skuldara komnir í fen skulda vegna persónulegs bruðls. En hvert einasta keis er ólíkt hinum.

 

Mín skoðun er í stuttu máli:

A. Ef þetta fyrirtæki er að svindla í Noregi, af hverju eru þeir þá ekki að svindla á Íslandi? Það er full ástæða á opinberri rannsókn sem myndi leiða í ljós hvort þeir séu að fara eftir reglum.

B. Kannski er mikilvægara í þessu að rannsókn myndi hugsanlega líka leiða í ljós SKORT á reglum því svona "business", er frekar nýr af nálinni af þessum kaliber.

C. Svo er þetta er kannski enn mikilvægara mál þegar við erum að horfa upp á snaraukna stéttaskiptingu í landinu og svo líklegann samdrátt á landinu, -sem þýðir mögulega fjárhagserfiðleika hjá fjölda fólks á næstu misserum. Fyrst og fremst þarf fólk í fjárhagskröggum vernd frá okurstarfsemi sem græðir á óförum annara.

Intrum Justitia berst fyrir starfsleyfi sínu í Noregi

Íslenskt barn í útlöndum og hvað er það að vera Íslendingur?

Lilja mín er 4. ára og býr hér í kanalandi. Móðirin er amerísk og talar enga íslensku. Ef ég mætti ráða myndi hún Lilja mín aðallega bara tala íslensku. Ég tala því eingöngu við hana á okkar máli. Les bara íslenskar bækur og ég slekk á kanasjónvarpi og set á íslenska DVD með frekju og yfirgangi. Ef ég gerði það ekki myndi hún ekki læra neitt í málinu. Þá þætti mér frekar langsótt að geta kallað hana íslenska því án málsins væri hún ekki með það sem er eitt aðalseinkenni þess að vera íslenskur: Að tala og skilja málið. 

Öll önnur áhrif á hana eru á ensku. Barnapían, krakkarnir í skólanum, mamman... Fyrir mér mætti þess vegna segja að enskan er algert aukaatriði fyrir mér líka. Þó auðvitað sé það ekki alveg svo bókstaflega, ég verð bara að vera svona einstrengislegur með þetta svo hún geti talað við litlu frænkur sínar á Íslandi, farið í skóla á Íslandi seinna meir ef hún vill, lesið íslenskar bækur og vefsíður. Og talað við ömmu og afa, frænkur og frænda án þess að svissa yfir í enskuna. Það er nú svo þannig líka að þó íslendingar séu sleipir í ensku, þá tapast helmingur úr samræðum við að svissa yfir úr íslenskunni. Hvort sem mönnum líkar betur eða verr, þá er það í gegnum móðurmálið sem allt annað skilst; bókmenntir, tónlist, leikrit, samræður, brandarar, Íslensk menning, tilfinning fyrir því sem skilst á milli línanna... hvernig hægt er að vera íslenskur án málsins fæ ég ekki skilið. Það hlýtur að vera erfitt. Samræður Íslendinga á Ensku eru aðrar samræður en þær sem fram fara á Íslensku, eitthvað sem ég hef tekið mikið eftir í gegnum árin. Einhver veggur sem skilur að.

Ég tek hattinn ofan fyrir þeim útlendingum sem flytja til Íslands og læra þetta erfiða mál og setja sig inn í það að vera íslendingur. Innst inni er maður það sem maður er alinn upp við. Það er því mikill ásetningur að gerast íslendingur. 

Nú er ég búinn að vera í BNA síðan 1983. Mér finnst ég enn vera á leiðinni heim einn góðann veðurdag. Þetta er langur tími og það sem hefur haldið við íslenskunni áður en netið kom sérstaklega, er að faðir minn hefur reglulega sent mér tætinga úr íslenskum dagblöðum alla tíð. Það hefur komið pakki á 2ja vikna fresti síðan 1983! Án þeirra hefði ég misst töluvert mikla tilfinningu fyrir málinu á fyrsta áratugnum, enda erfitt að halda því við með fáa eða enga íslendinga í kringum mann. Geri ráð fyrir að ýmislegt sé farið að ryðga án þess að ég viti af þvi. 

 

Fornbílaklúbbur, af hverju ekki 727-100

727-100 fyrsta þotan sem kom til landsins 1967 er að sjálfsögðu merkur áfangi í sögu Íslands. Þotan sjálf er ekki bara svoldið kúl eins og gömlu fornbílarnir sem fæstir myndu fussa og sveia yfir. Hún er upphafið á nýju tímabili í sögu landsins. Hún er ein af þessum með dyrnar á rassinum ef svo má segja, gengið er út að aftan með innbyggðum stiga. Það eru varla fleiri en 100 slíkar vélar í notkun í dag, síðast þegar ég flaug með einni slíkri var frá New York til Mexíkó í Ágúst 2001.

En málið með þoturnar er að þær gerbreyttu landinu. Einangrun var þá að fullu rofin, sem hefur haft miklar afleiðingar fyrir þjóðfélagið allt. Ferðalög til útlanda jukust og auðvitað er því þannig háttað í dag að þotan er ómissandi máttarstólpi þjóðfélagsins. Við myndum ekki lifa eins og við gerum ef ekki væri fyrir þotur af öllum stærðum og gerðum. Þá er eðlilegt að spyrja hvort ekki sé nauðsynlegt að hlúa að rótunum og eiga fyrstu þotuna? Hversu mikils virði er að eiga hlut sem gerbreytti þjóðinni? Ef við lítum aftur og hugsum að ekki hafi henni verið bjargað þegar kostur var á, þá kannski eiga menn eftir að baga sig í handabakið. Svona til samanburðar, er hægt að setja verðmiða á fyrsta Íslenska bílinn? Á fyrsta íslenska reiðhjólið? Fyrsta steinhúsið? ... Hversu mikils virði eru fornbílarnir í fornbílaklúbbnum? Eru þeir ekki menningarverðmæti? Jú auðvitað eru þeir það. Og svona þota er það líka. Það má segja að þotur séu stór lykill að menningarverðmætum.

Svo væri flott ef flugvöllurinn í Reykjavík yrði gerður almennilega upp með glæsilegri nýrri alþjóðaflugstöð í Vatnsmýri og eitt gamalt flugskýlið gert að flugvélasafni. Flott þar, á alþjóðaflugvelli í hjarta Reykjavíkur.  Ef ég ætti kost á að lenda í Reykjavík eða Keflavík myndi ég sannarlega velja Reykjavík.

Fyrsta þota Íslendinga í hættu

Gulrætur

Mér varð hugsað til þess að gulrætur eru sagðar svo óskaplega hollar fyrir sjónina. Hvers vegna þá eru kanínur svona sjóndaprar?

Menn dinglandi á palli fyrir utan gluggann hjá mér.

Tók þessa mynd af mönnum sem hafa verið að gera við fyrir utan gluggann hjá mér. Þeir eru að bora og lemja á þar til gerðum palli sem dinglar utan á byggingunni. Vonandi fara þeir bara varlega!

Menn hér setja aðra meiningu í þétt skipulag. Hér í New York eru lóðir vel nýttar eins og sést ef litið er niður með götunni.  Bara spurning hvað ég á við með "niður!"

PLÚMS: Að plúmsa eða ekki plúmsa.

Að Plúmsa.

Eftir því sem ég kemst næst er orðið "plúms" komið frá heimili Ólafs afa og Maríu ömmu í Brekkugötu á Akureyri. Það hefur s.s. verið um miðja síðustu öld, a.m.k. 1940-50. Seinna mikið notað á heimili mínu og á uppeldisárum okkar systkynanna var jafnan talað um að kenna krökkum að "plúmsa" í klóið. Þetta hefur kannski þótt meira "viðeigandi," veit ekki.

Ég var vanur þessu orði en enginn vinanna virtist vita um hvað verið var að ræða. Kannski ekki rætt mikið. Svo seinna meir sagði mér kunningi að hann hefði aldrei heyrt orðið áður en þætti það furðulegt. Verð eiginlega að vera sammála þessu. Og að orðið sé alveg frábært. Nú leikur mér forvitni á að vita hvaðan þetta kemur upprunanlega eða hvort orðið hafi náð einhverri útbreiðslu annars staðar.

Einnig var þetta orð notað hvorutveggja sem lýsingarorð og nafnorð.

Ætli nafnorðið beygist ekki svona:

Hér er plúms

um plúms

frá plúmsi

til plúms 

 

Notkun:

"Þarftu að plúmsa, Gunna mín?"
"Hann plúmsaði þrisvar, en eitt var bara lítið plúms."
"Með plúmsinu skvettist mikið vatn."
"Ég er búinn að plúmsa, komdu að skeina mér!" 

síma-saur, hvernig losna á við síma-saur.

Þegar síma-saur hringir, þá hef ég alltaf sömu taktíkina. Síma-saur er leiðinda gaur sem hringir utan úr bæ og býður eitthvað á frábærum kjörum og er leiðinda truflari og á ekkert erindi í að hringja í mig til að bjóða eitthvað sem ég bið ekki um að fyrra bragði.

Hér í USA eru síma-saurar skæðir og mér skilst að þeir séu hvimleitt vandamál líka á Íslandi þar sem auglýsingar eru GUÐ.

 

Ég er með lausn á þessu vandamáli. Það er svona:  

"Hello, Mr. Thordarson, I am calling from bla bla, and would like to offer you bla bla bla  bla bla bla  great bla bla bla  bla bla bla you´ll really enjoy,...  bla bla bla  bla bla bla  ...etc"

Viðbrögð: "Wow, how interesting, can you hold on just ONE second please?"

Svo legg ég símtólið framan við hátalarann og leyfi síma-saur að hlusta á íslensku gufuna þangað til ég heyri sóninn með að búið er að skella á. Þá fyrst set ég tólið aftur á símastæðið. Stundum líða 2 mínútur og núna áðan liðu 15 mínútur! Húrra, annað met!

Svona getur maður eytt tíma síma-saurs í vitleysu. Spreðið boðskapnum! 

Nýju fötin keisarans. Íslenski fjármagnsmarkaðurinn og Danske Bank.

Það er nú aldeilis merki um brauðfætur ef allt sem þarf til er að danskur banki segi eitthvað og þá geti allt hrunið og farið fjandans til.

Þá er það nú ekki dönskum að kenna, heldur hvernig kerfið er upp sett. Spilling er aldrei góð ávísun upp á sólid framtíð. Svo er ekkert nýtt undir sólinni að nýja braskarakerfið er spilaborg byggð á erlendum fyrirmyndum, sem getur hrunið án mikils fyrirvara. Hefur skeð margoft áður um heim allann. Að það skuli ekki mega segja það er þá eins og í Sovét fyrrum, bannað að segja satt af því það gæti valdið vandræðum.  Ekki er nóg að benda á Danina, þó stundum hafi Danskir braskarar og einokarar gert Íslendingum illt í gegnum söguna. 

Það er mun gagnlegra að benda á vandamálið sjálft. 

Minni því af þessu tilefni á sögu hins ágæta Dana, Hans Christian Andersen: Keiserens nye Klæder. Hana er hægt að lesa hér að hluta til, fyrir þá sem áhuga hafa. Hún kennir okkur margt, þ.á.m. um afleiðingar sjálfsblekkingar, sjálfsdýrkunarsýki, þjónkunarsemi við valdhafa (les. valdhafa auðs) og um lygina ofl.

Gagnlegast er að sjá keisarann sem íslending, talsmann almennings, hinn raunverulega handhafa lýðræðisins.

Verið að skrúfa fyrir súrefnið til Íslands

Til er einfaldari lausn: Millilandaflug (farþega) í Vatnsmýrina.

Snjómokstur á Reykjavíkurvelli, svo Keflavíkurvelli, snjómokstur tvöfaldaður á tvöfaldaðri Reykjanesbraut, nú snjómokstur á lestarteinum. Já viðhald, halló. Á mamma að borga þetta? Hvers vegna vera að þessu öllu saman þegar hægt á að vera að fljúga millilandaflug beint í Vatnsmýrina og nota Keflavíkurvöll fyrir fraktflug, einkaþotur og varaflugvöll? Og Leifsstöð sem birgðargeymslu.

Ég veit það er hallærislegt að stinga upp á svona, en það er þjóðráð að reyna að hagræða svoldið með samþjöppun í þessu þjóðfélagi. Millilandaflugið í Vatnsmýri myndi spara þjóðfélaginu gríðarlegar upphæðir, fáir flugvellir eru eins langt í burtu í heiminum og Keflavíkurvöllur er frá Reykjavík. Og spara manni þessa leiðinda keyrslu sem Reykjanesbrautin er. Millilandaflug farþega í Vatnsmýrina myndi líka styrkja miðbæinn og ýta undir möguleika með samheldni í samgöngukerfum innan borgarinnar.

Nú held ég sé betra að setja fé í að rannsaka hagkvæmni þess að stækka Vatnsmýrarflugvöllinn rétt nægilega, og hvað þarf til að gera almennilega flugstöð sem annar innanlands og millilandaflugi -í Vatnsmýrinni. Þá er hægt að læra af öllum mistökunum gerðum í Leifsstöð. 

Ég sé fyrir mér flotta flugstöð í Vatnsmýrinni sem annar innanlandsflugi, millilandaflugi, rútuferðum um landið, strætóstoppistöð og jafnvel einn stoppipunktur framtíðar lestar sem þjónar öllu höfuðborgarsvæðinu. 

Takk fyrir. 

Logan flugvöllur að neðan, rétt hjá háhýsamiðborg Boston borgar. Þeir eru heppnir í Boston að hafa flugvöll svona í miðri borg. Enda einstaklega hagkvæmt fyrir farþega og alla flutninga. Ekki dytti neinum í hug að flytja Logan flugvöll til Kentucky! Já eða Krísuvíkur. Já eða...skyldi ég þora að segja það..: K---------??

Vilja láta skoða hagkvæmi lestarsamgangna

Flugvöllinn í Keflavík sem fyrst!

Mér dettur fyrst í hug þessi samlíking: Ef á Íslandi væri lestarkerfi sem tengdi saman landsbyggðina og að endastöðin væri í Reykjavík... Hverjir myndu staðsetja aðal lestarstöð Reykjavíkur í Grindavík?

Af hverju hafa bílastæðið sitt við einbýlishúsið í Grafarvogi þegar hægt er að leggja bílnum í Hafnarfirði!

Flugvöllurinn í Reykjavík er samgöngumiðstöð, hún gegnir mikilvægu hlutverki í samgöngum innanlands.  Með flugvelli í Reykjavík er hægt að komast út á land á örskömmum tíma og með miklum þægindum. Ég hef oft bloggað um þetta áður á mínum fyrri bloggsíðum og líka á nokkrum kjaftasíðum.

Hér eru nokkrir punktar endurteknir með smá viðbót:

1. Borgarkipulagið og það sem hefur verið byggt á sl. áratugum hefur sýnt og margsannað að á Íslandi fæst ekki byggð almennileg borg. Í staðinn hefur frá seinni heimsstyrjöld verið staglast á erlendum hugmyndum um að borg sé eitthvað fyrir bíl, með afdrifaríkum afleiðingum fyrir samfélagið. Og mikið rýrnuðum gæðum á borg og samfélagi sem myndast og mótar borgina. Reyndar er mikill meirihluti íslendinga alsendis ókunnur því hvað það er að búa í borg. Með öðrum orðum, þrátt fyrir að skemmtilegar hugmyndir komi fram, þá eru yfirgnæfandi líkur á að þær verði súrsaðar, sneiddar niður og settar í pastavél borgarskipulagsins sem breytir því í færibandahönnun hins dæmigerða úthverfis. 

2. Flugvöllur í Vatnsmýrinni gegnir margþættu hlutverki, m.a. sem sjúkra- og varaflugvöllur. Til að mynda nú um daginn lentu Flugleiðaþoturnar í Vatsmýrinni því ófært var í Keflavík eða ekki var talið ráðlegt aðreyna lendingar í Keflavík. Ef byggt verður í Vatnsmýrinni verður að rífa dýrann flugvöll og byggja dýrann varaflugvöll annars staðar. Mér skilst að það sé erfiðleikum háð að finna jafn góðann stað og í Vatnsmýrinni.

3. Flughættur. Staðreyndin er að farþegaflug er hættulítið í dag. Auknar kröfur um flugöryggi og eftirlit með vélum, veðuraðstæðum og þar fram eftir götum, hafa fyrir löngu gert flugið að mjög öruggum samgöngumáta. Að því gefnu að mörgþúsund farþegaþotur eru í loftinu á hverju einasta augnabliki er hreint merkilegt að minna en þúsund manns létust í farþegaflugi í heiminum á öllu síðasta ári. Til samanburðar má nefna að í Bandaríkjunum einum saman látast um 40,000 manns í bílaumferðarslysum. Ætli það sé ekki gagnlegra að kenna íslendingum að keyra af tillitssemi en að hrópa úlfur með hættur af völdum flugvéla? Kannski er flug"hættan" ámóta fóbía og þær fóbíur sem verið er að mata ofan í fólk í gegnum misgóða fjölmiðla um allskonar dellu og rugl. 

4. Ef menn vilja líta á vatnsmýrarsvæðið sem plássfrekt og að það sé með "dýrum lóðum" sem nýtast illa undir "bara flugvöll", þá eru menn enn einu sinni að horfa framhjá sjálfu megin-vandamálinu. Helmingur borgarinnar fer undir blikkbeljur og menn virðast úrræðalausir gagnvart því vegna þess að borgarskipulagið er fast í löngu úreltum skipulagsforsendum. Sú staðreynd að helmingur skipulagsins fer í úrlausnarverkefni tengdum bílum er nægilegt til að benda á þá fásinnu að Vatnsmýrarsvæðið sé eitthvað sérstakt hvað viðkemur bráðnauðsynlega góða nýtingu, hvað þá uppbyggingu á því landi. Lóðagróði er kannski sérfag braskara en fyrir fljúgandi fólk skiptir það litlu. Hagkvæmnireikningarnir eru afar afstæðir.

5. "Vatnsmýrin mun styrkja miðbæinn." Þetta er fullyrðng sem mikið er hampað. Staðreyndin er þó að miðbærinn byggist í kringum kvosina og Laugaveginn og götur þar út frá. Ef íbúar í Þingholtum ganga í Vatnsmýrina frekar en á Laugaveginn, þá mun vatnsmýraruppbygging draga úr styrkingu Laugavegs og núverandi miðbæjar.  Þar fyrir utan er Vatnsmýrin kílómeter fyrir sunnan miðbæjarsvæðið, aðskilið með bröttu Skólavörðuholti, íbúðarhverfi, tjörn og hraðbrautarvitleysu og mun því hafa svipuð áhrif á núverandi miðbæ eins og að setja shopping mall í Vatnsmýrina. 

6. "Innanlandsflugið í Keflavík!" Það eru 40 mínútur til Keflavíkur frá Kringlumýrabraut/Miklubraut. Aðra leið.  Það bætir við einum og hálfum tíma við flug sem tekur einn tíma frá Vatnsmýrinni. Gríðarlegur kostnaður reiknast árlega af ferðum til Keflavíkur og með innanlandsfluginu fært þangað er í raun verið að reka líkkistunagla á innanlandsflugið utan fluga á afskekktustu staðanna. Ísafjörð að vetri til... Útreikningar með lestarteina benda á mikinn kostnað, nógu mikið vesen hefur verið að fá tvöföldun Keflavíkurvegar, með tilheyrandi auknum snjómokstri etc. Keflavíkurvegur hefur reynst dýrkeyptur í dauðaslysum. 

Enn einu sinni eru menn að reyna að leysa uppbyggingu miðbæjar með rökum um að byggja annars staðar. Þetta er fallít hugsun því miðbær byggist ekki upp nema með innri uppbyggingu. Flestir eru svo gegnum sósa í úthverfadraslskipulagi að jafnvel vilja ekki sjá að þessar blokkir við Skúlagötu eru forljótur andskoti sem á ekki heima í miðbænum, með sínu úthverfaskipulags-fyrirkomulagi og áherslu á bílastæði eins og við eitthvað shopping mall. Þau hýsi eru anti-borg rétt eins og það sem yrði byggt í Vatnsmýrini, ef grænt ljós væri gefið á byggingu flugvallasvæðisins.

Og kjarni málsins er líklegast sá að það er þröngur hópur fjárfesta sem er að slefa yfir hvað hægt sé að græða mikið á Vatnsmýrarbyggð.

Málverkið er dautt!

Eða svo hafa margir verið að segja. En miðað við perraskapinn hjá stjórnendum neðanjarðarlestakerfis Lundúna, þá virðist sem svo að málverkið sé ljóslifandi og kalli jafnvel fram einhverjar náttúruhvatir hjá misvitrum kirkjuræknum kindum sem eru svo ólánssamar að þvælast í dimmu neðanjarðarkerfi Lundúna og gætu orðið vitni að málaðri mynd. Kannski erum við að tala um að innan listageirans sjálfs eru menn sem eru að reyna að myrða málverkið, og að hliðstæðu þeirra sé að finna í embættismönnum með hagræðingarvírus.

Mynd af nakinni Venus bönnuð í lestum London

Hagnaður tannlækna jókst í samræmi við ofurhagnað Coca Cola

Gleymdist ekki að segja alla söguna í þessari frétt? 

 

Það er ekki bara Coca Cola sem hagnast á tanneyðingardrykkjum og sælgæti í vökvaformi. Amerískir tannlæknar eru furðulegir, þeir sem ég hef farið til eru eins og bílasalar og æsast mikið við að sjá fram á stórgróða í skolti manns. Er það ekki frábært líka þegar þeir græða?

Eins og venjulega virðist einblínt á að eitthvað fyrirtæki þéni svona og svo mikið eins og það skipti einhverju fjandans máli fyrir okkur? Coca Cola græddi 1,21 milljarði dali eitthvað bla bla. Kommon. Er landinn orðinn svona djúpt sokkinn í aurasýkinni að halda að þetta sé eitthvað merkilegt? Þetta er tilkynnt á mbl vefsíðu innan um blikkdrasl auglýsingar. Þessi frá Icelandair hefur verið að ljúga með eitthvað tilboð á $370 sem svo stenst ekki. Lygarar. Og öllum er sama nema einhverjum fámennum brask hóp sem bíður spenntur eftir að sjá hvað Icelandair græddi á árinu. Hvað græddu þeir svo mikið á lyginni einni saman og já var það ekki bara frábærastast af því öllu saman. Að ljúga og komast upp með það. Það þykir jafn flott og að stela. Hvað þá að stela og stilla svo húseigendum upp við vegg og hóta að fara með þýfið úr landi.

Í kvöld pantaði ég mér tvær bækur: 

The Disposable American: Layoffs and Their Consequences.

og 

The Prize: The Epic Quest for Oil, Money and Power.

Vonandi verða þær betri lesning.  

Hagnaður Coca-Cola jókst um 79%

Einkavæðing. Áríðandi tilkynning varðandi tannheilsu.

Hið Íslenska Tannlæknafélag Ehf og Candyman Group, samtök sælgætisframleiðenda, hafa tilkynnt samruna. Nýtt fyrirtæki Tann-out EHF hefur verið stofnað og stefnir á útrás og innrás. Tannáta er ekki aðeins skaðleg ímynd sælgætisframleiðenda, heldur veldur mikilli aukavinnu meðal tannlækna. Og aukinni einveru meðal barna þeirra. Til að sporna gegn tannátu hafa samtökin Tann-Out það til markmiðs að stefna að bættum kjörum tannátusjúklinga. Með sameiginlegu átaki mun tannátusjúklingum m.a. bjóðast afsláttur á tannviðgerðum gegn framvísun kassanótna fyrir sælgætiskaupum. Þeim mun meiri sælgætiskaup, þeim mun meiri afsláttur, allt að 4%. Sjá nánar smáa letrið. Þetta mun leiða til aukins sparnaðar meðal tannátusjúklinga og aukinnar hagræðingar fyrir þjóðfélagið í heild sinni í samræmi við tilskipanir frá alþjóðabankanum sem veit allt eins og Guð. 

Með stofnun samtakanna er gert ráð fyrir að auknar tekjur í þjóðarbúið verði á bilinu 1500-1650 miljónir. Skattgreiðslur til styrktar ríkinu munu nema allt að 300 milljónum árlega. Tann-Out mun veita styrk allt að  5 milljónum árlega til handa listamönnum sem annars væru vísir til að gagnrýna fyrirtækið. Markmiðið er jú að sýna fram á að einkavæðing heilbrigðiskerfiins myndi skila margföldum gróða á við þetta ríkisbákn! 

Björgvin Halldórsson veldur umferðarslysum á Manhattan!

Í gær fór ég að venju að ná í Lilju mína í skólann, á hjólinu með aftaníkerrunni. Þetta er um 10 km leið og hjólastígur meðfram mikið farinni götu meðfram Hudson ánni. Um eftirmidaginn átti ég eftir 5 mínútur að skólanum og leit á bíl svoldið fyrir framan. Hann stöðvaðist þá skyndilega og sá fyrir aftan hann negldi beint aftaná og stórskemmdist. Þegar ég hjólaði framhjá var fólkið að fara úr bílunum. Vonandi óskaddað.
Svo á bakaleiðinni áttum við fimm mínútur eftir að komast heim. Ég leit á bíl sem var aðeins framar og þá bremsaði hann og sá fyrir aftann negldi á hann og einhverjar skemmdir urðu. Fólkið var að fara úr bílunum þegar við hjóluðum framhjá þeim. Vonandi meidist enginn. Ég hugsaði með mér að þetta væri furðulegur andskoti!

Já þetta þótti mér nú í hæsta máta undarlegt. Tvisvar sama daginn. Svo áttaði ég mig á því að Björgvin Halldórson var á mp3 spilaranum hennar Lilju. "út um græna grundu." Gæti verið að þegar Björgvin syngur fyrir Hudson ána að þá... ? 

"Tökum upp dollarann strax!"

Eða svo hljóðuðu margir fyrir 5-10 árum. En nú hefur dollarinn víst lækkað mikið og þá hljóðnuðu dollaramenn. Nú segja "allir" sem einn: Tökum upp Evruna! Svo þegar Evran lækkar þá munu menn segja "tökum upp krónuna aftur!" Eða hvað?

Er þessi breyting eitthvað sem aðallega kemur fjárfestum til góðs, þ.e. þessum 1-2% þjóðarinnar, eða mun notkun Evrunnar hjálpa venjulegu fólki sem nennir að vinna? Er betra ef kennari, til dæmis, fær útborgað í evrum? Og af hverju er það betra, þá til langtíma litið og ekki með hliðsjón af fjárfestingum kennara, því þær eru í raun engar eða skipta litlu.

Nú er í algleymingi tal um að á Íslandi sé best að búa. Lífsstaðall bestur og allt best og frábærastast. Er þá eitthvað að? Er ástæða til að breyta því sem gott er? Getur verið að krónan hafi spilað inn í? Ekki varð Ísland "á toppnum" af því evran var til staðar.

Eða er kannski í raun eitthvað mikið að? Mér dettur í hug orð eins og sýndarveruleiki eða spilaborg en uss, má ekki segja svona.

Krónan að verða viðskiptahindrun

Þverstæður í fréttum.

Tók eftir því að rétt áður en þessi skýrsla var birt um mistök Ísraela, kom önnur frétt eða einhvers konar "tilkynning" um að Olmert hafi barasta staðið sig vel í þessu stríði. Svona er fréttamennskan, hver yfirlýsingin þvert á haus við aðra. Hvernig á maður að vita hvað er rétt og hvað er ekki rétt? Geta fréttamenn kannski greitt úr þessu fyrir okkur og sett sjálfir inn smá skýringar eða vinsað úr það sem er eiginhagsmunapot? Eða er ég að misskilja eitthvað? Kannski liggur hundurinn grafinn í því að fréttir eru ekki betri ef þær koma strax inn, hugsunarlaust eins og næsti drykkur alkóhólistans. Er ekki betra að bíða stundum, fara aðeins yfir efnið og splæsa saman fréttir að utan til að móta eina betri sem gefur betri sýn á málefnið? Bara spyr. 

Nú vantar link af frétt Mbl.is á skýrsluna svona til að klára málefnið sjálft. Takk fyrir.

Ísraelum „mistókst alvarlega“

Ferð til Íslands síðla Janúars * Lending heima * Nettenging á flugstöðvum * Erró bókin * Mikines * Slavoj Zizek * Kominn aftur til New York

Ferð til Íslands síðla Janúars.

LENDING OG LEIT HEIMA
Fór til Íslands í síðustu viku á ýmsa vinnutengda fundi og lenti í þessari leiðinda Leifsstöð eins og það sé einhver annar valkostur. Þar tók við agressíf leit á manni. Skil ekki hvað verið er að leita á farþegum eftir að búið er að gera nákvæmlega hið sama á JFK! Dæmalaus tvíverknaður og mér sýndist á starfsfólkinu það nú ekki vera voða sannfært um að vera að sinna starfi af viti. Fólk er að lenda eldsnemma, margir ósofnir og maður er með unga dóttur í meðförum og svo tekur við ímynd lögregluríkis þar sem fækka þarf fötum og maður rannsakaður eing og glæpon. Brandarinn er að einn starfsmaður var látinn standa við borð og spyrja farþega hvort þeir væru með gos eða vatnsflösku. Svo voru farþegarnir látnir annað hvort þamba gosið á staðnum eða henda því. Auðvitað eins gott því Icelandair gæti verið að útbýta sprengjugosi meðal farþega í fluginu vestanfrá. Eitthvað að í lógíkkini hér, nema Coca Cola vilji selja meira inní flugstöðinni, þá meikar þetta fullkomlega sens. Fólk á jú að styðja betur við bakið á þessum grey fyrirtækjum sem rétt hanga á horreiminni á þessum síðustu og verstu tímum.

NETTENGING Á FLUGSTÖÐVUM
Ferðaðist einnig til Egilsstaða og kom því við á 3. flugvöllum. Það þykir mér afar slappt að aðgangur að frírri þráðlausri nettengingu er enginn! Lélegt hjá þessum flugfélögum að geta ekki haft ókeypis nettengingu fyrir farþega, margir hverjir hafa fartölvur og tíma til að bíða, þetta er jú árið 2008. Flugfélagið hefur vel efni á að koma upp routerum og tengja farþega inn á netið án þess að þeir þurfi að vera að greiða utanaðkomandi aðilum fyrir svona einfaldann hlut. Hér í New York fer ég t.a.m. ekki á kaffistofur nema fyrir hendi sé ókeypis þráðlaus nettenging. Annað er nirfilsháttur og ég styð ekki slíka businessa. Í Keflavík þarf maður t.a.m. að tengjast einhverju djöfuls TM fyrirtæki (held það sé nafnið) sem rukkar 500 kall á klst! Tómt rugl og dæmi um hve vel Skröggur frændi hefur orðið fyrirmynd landsmanna og framsóknarmennskan með einokunina er ennþá landlæg plága. Þetta er enn eitt dæmið um af hverju sumir útlendingar telja sig rúna inn að skinni við að heimsækja þetta blessaða land. Hvað kemur næst? Setja 10 kr í þar til gerða rauf til að fá eitt blað af klósettpappír í flugstöðvarbyggingunum? Eða 10 Kr fyrir 3 lítra af vatni úr krananum í vaskinum? Kannski best að vera ekki að stinga upp á svona hugmyndum, mín reynsla er að þær eru stundum framkvæmdar. Ekki vantar fólk með hagræðingar"vit" sem flækir hlutina í staðinn fyrir að fá sér heiðarlega vinnu.

ERRÓ
Ætlaði svo að fara á Erró bóka-undirskrift. Það var kl. 14:00 á Laugardegi fyrir viku. Ég svaf yfir mig, afsökunin: Nýlentur og grænn í framan af svefnleysi. Ætlunin var að reyna að fá listamanninn góða til að skipta á eintaki af bókinni minni sem í undirtitli heitir nú bara óvart sama nafni "Ólafur Þórðarson í tímaröð 1977-2007." (sjá link á Gegnumgang efst til hægri). Ætli honum hefði ekki bara fundist það svoldið skondið? Verð að kaupa þessa bók í næstu ferð. 

MIKINES
Á Föstudag fékk ég svo nasasjón af sýningu Mikines og skoðaði verkin þar í friði daginn áður en opnunin var. Frábært yfirlit hjá Aðalsteini Ingólfssyni um merkilegann málara, sýningunni vel upp raðað með ákveðinni lógík í myndefni. Það er eitthvað mjög heilsteypt við þessi verk sem vantar oft í listina í dag, einhver meðvitund um eigin smæð og hógværð innan um stærri öfl. Kannski var sjálfsdýrkunarsýkin ekki á eins háu stigi og hún er núna? Jarðarfararmyndir endurspegla tíðaranda þar sem virðing var borin fyrir einhverju stærra en maður sjálfur er. Sumar fígúrur næstum andlitslausar og þögnin yfirráðandi. Svo eru þarna líka falleg portrett verk, leist sérlega vel á þau sem eru með grárri móðu yfir öllum myndfletinum. Sem og litríkar geómetrískar bæjarmyndir sem endurspegla svipaða stíla annara listamanna með fjall í bakgrunni o.s.frv. Ein myndin "Skipin láta úr höfn" minnir mig á Ópið hans Munch. En á allt annan máta og með meira jarðbundnu yfirbragði. Þá á Laugardag komst ég svo á sjálfa Mikines opnunina og boðaði þangað nokkrum félögum og ættingjum líka. Þar var troðið og gott að koma, hitti m.a. listamanninn JBKRansu. Næsta skrefið er að eigna sér þessa fínu Mikines bók sem gefin var út á síðasta ári, væri fróðlegt að fara í gegnum hana. 

SLAVOJ ZIZEK
Tókst svo á Laugardaginn að sjá Zizek fyrirlesturinn. Heimspekingurinn stendur fyrir sínu og er eiginlega afkastamikill í að auka áhuga fólks á faginu. Fyndið að spurningarnar þarna í lokin virtust benda til að menn kannski skildu ekki allt sem hann var að fara. Stalst til að taka upp þennan fyrirlestur, maðurinn er eiginlega einn af mínum uppáhalds núlifandi karakterum og ég verð nú að eiga mína hljóðmynd af honum. Mér þóttu áhugaverðastar pælingar hans um náttúrufræði og hlutverk hennar í heimsmynd samtímamanna. Samlíking hans með "ignorant chicken" voru ansi hnittnar og tær snilld. Ég nennti nú ekki að fá undirskrifaða bók hjá honum. Kannski hefði ég átt að bjóða honum að býtta, eins og með Erró. Allavega er bókin mín með gati í gegn, sem er heimspekileg pæling líka, m.a. um rýmið og fjórðu víddina.

FLUGFERÐIN GÓÐA
Kom aftur til New York í gærkveldi. Vélin fór í loftið í rokinu mikla í gær og þótti mér flugtakið frábært. Svona miðað við farþegaflug þar sem aldrei skeður neitt. Vélin tók stefnu á flugbrautinni beint á rokið og þegar hún tókst á loft fór hún eiginlega bara lóðrétt upp og þótti mér þetta bara einstaklega kúl.

Framtíðin er komin! DVD spilarar og tækni, leiðindatól sem gera mann úrillann!

Keypti ferða-DVD geislaspilara fyrir um ári. Nú er þetta rusl ónýtt. Fyrsti gallinn kom þegar hann neitaði stundum að spila síðustu kaflana á DVD diskunum. Ákaflega pirrandi. Svo nú um daginn fór skjárinn alveg. Framtíðin er hér! Allir í biðröð til að kaupa DVD!

Það versta við þessa DVD tækni er að maður þarf oft að horfa á einhverjar ömurlegar auglýsingar og of flókið eða bara hreinn ógerningur að spóla framhjá þeim. Maður kaupir þessa diska dýrum dómum og þeir eiga ekki að vera með auglýsingasorpi eins og einhver andsk. MBL.is Las Vegas blikk-forsíða. Hversu oft er hægt að heyra úrelta bankaauglysingu sem segir Gotti borðar Ost hjá Glitni eða hvað í fjandanum það er? Svo þegar myndin er loksins byrjuð að spila, þá á tækið til að hakka og leikarar breikdansa eins og Michael Jackson. Þetta var ekki í handritinu! Svo í lok myndinnar tekur ekki betra við. Þá fer DVD spilarinn yfir á eitthvað asnalegt "Þemasvæði" þar sem sama örstutta svuntuþeysa laglínan spilar aftur og aftur og aftur og aftur ENDALAUST eða þar til maður stekkur til að stöðva klikkunina, áður en maður fer endanlega yfir um og nær í haglarann eða sparkar helvítis DVD draslinu út um gluggann. Beint í haug af "framtíðartækni" rusli. Þessi leiðinda hjakk-galli er mun verri en með LP spilara frá 1970 sem voru ekki með sjálfkrafa nálar-armi og hjökkuðu í endafarinu endalaust. Nógu slæmt var það nú. Sölumenn í gamla daga uppgötvuðu sem betur fer ekki að hægt var að setja auglýsingu þar inn á endann á LP. Pælið í þessum hugarfarsbreytingum og lágkúrunni sem ríkir á sumum sviðum.

Ekki bætir úr skák að BANNAÐ er að spila Evrópska diska í USA og öfugt. Þetta er snarklikkað og stórgallað. Já, ég veit að hægt er að fara á netið og prógrammera eitthvað með hundakúnstum með fjarstýringu sem engin leið er að læra á eða finna út með. Stór gallað drasl þetta DVD rusl. Minna tækninnar vegna, en meira vegna söluskrums- einkaréttar- og stórfyrirtækjahundakúnstastæla peningasjúkra einstaklinga með hagræðingadellu að hagræða hvernig eigi að græða á því að gera ekki neitt. Svo ætla menn að einkavæða orkufyrirtækin á svipuðum forsendum? Gúdd lökk þarna á Íslandi, welcome to America!

Síðan ef maður er með VHS tæki til að taka upp af DVD, þá bannar tækið manni að taka upp af disknum, svo þessi möguleiki er afskrifaður þó maður vilji setja saman barnaefni á spólu fyrir barnið sitt. BANNAÐ að taka upp efni til einkanota! WTF?? Svo eru menn að segja að ríkið sé með höft og bönn? Kommon. Bönnin eru bara farin yfir í einkageirann. Þar eru bönnin búin til á fundum til að gróðasjúklingar fái að græða meira. Við erum komin með stefnið fram yfir fossbrúnina, kæru vinir. 

Ég er gáttaður yfir þessari vitleysu allri. Lífið versnandi fer og einhverjir græða á að skerða frelsi okkar hinna með truflunum og flækjum sem eru tómur tilbúningur manna með samkeppnissýki og peningavírus inn á heila. Það er ekki lengur einfalt mál að horfa á góða bíómynd, varla hægt vegna bilana.

Góða nótt. Er farinn að lesa bók. Framtíðin er í svoleiðis tækni og Guð blessi Gutenberg.

Óska eftir útlitsmyndum af (nýjum) Laugavegi 4-6

Hvað kemur í staðinn? Hvar eru myndir af því sem koma skal? Það er engin leið að dæma nema sjá þær. Verður það gott eða vont? Ef þegar væri búið að rífa þessar nústandandi byggingar myndi málið ekki snúast um þær, heldur hvort nýjar byggingar séu nógu góðar fyrir Laugaveginn. 

Vegna sérstöðu Laugavegar, já eða borgarlífs almennt séð, þá er það ekki einkamál tilvonandi byggjenda sem hljóta jú að sjá hag sinn í góðri byggingu. Eða er ætlunin að fá peninga út úr þessu, one way or the other miðað við allt hitt í þessu blessaða þjóðfélagi. Spurningin er hvað er góð bygging fyrir árið 2008, í þessu umhverfi. Hvar eru teikningarnar?

Ég er í sjálfu sér alveg hlynntur því að byggja þarna, en það er ekki sama hvað það byggt verður. Hef ekki séð EINA viðeigandi eða góða nýbyggingu við Laugaveg, Stjörnubíósreiturinn er ljótur andskoti og passar inní hverfið eins og boli inni í Trabant og kýlir upp fasteignaverð enn frekar með rándýrum íbúðum. Eins og það megi við því? Kem til Íslands í næstu viku og ætla að leita betur á Laugaveginum að góðu nýhýsi, ég er vongóður mjög. En þá verðum við líka að skoða þetta mál sem einn af mörgum prófsteinum því plön eru um að byggja stórkarlaleg hús um allt svæðið. Meiri bákn en húsið á Stjörnubíósreit.   Plön eru um að rífa helling af húsum og vakna grunsemdir um hvort það sé viturt. Sjálfur sakna ég t.d. gamla stjörnubíóshússins, tel þau niðurrif mikil mistök. Anddyri Stjörnubíós sem farið var í með eftirvæntingu við að sjá kvikmynd og hitta kunningja hefur verið fjarlægt og í staðinn sett bílaport! Það eru hreinar afturfarir, ekki framfarir.

Allavega óska ég eftir myndum af því sem koma skal. Í allri umræðunni virðist það krefjast leitar. Þykir það furðulegt! Þá fyrst skal ég skella inn gagnrýni á nýja útlitið, hvort manni þykir það bæta götuna. 

Skyndifriðun beitt á Laugavegi

Þunn umræðan um húsvernd á Laugavegi.

Ég sem hófsamur maður er hvorki vilhallur þeim sem vilja græða á að byggja á þessum lóðum, sama hvað er rifið, hvað þá endilega þeim sem vilja vernda allt, sama hvað á bjátar.

Það sem vantar í þessa umræðu er einfaldara: Hvað kæmi í staðinn fyrir þessar byggingar?

Munu þessar nýju byggingar bæta Laugaveginn og reka styrkari stoðir undir samfélags og götumynd þessa svæðis? Mun útlit og notkunargildi nýhýsanna verða jafn ljótt og stórkarlalega langavitleysan á Stjörnubíósreitnum sem fellur ekki vel inn í umhverfi sitt? Myndu þær verða snilldar arkitektúr sem er götumyndarstyrkjandi?

Hvernig myndu nýbyggingarnar breyta þessu umhverfi og hvernig myndu þær breyta miðbænum og hvað er jákvætt við þær breytingar og hvað ekki? 

Hef sagt þetta áður en það eru FORRÉTTINDI að fá að byggja í miðbænum og alls ekkert einkamál byggjendanna eða einhverra fjárfesta. Það er þeirra að sýna fram á hvernig nýja lausnin vegur sterkara en húsverndunin. Góð lausn gefur grænt ljós, léleg lausn gefur rautt ljós.

Hvar eru þá teikningarnar yfir það sem koma skal í staðinn fyrir þessar gömlu byggingar? Af hverju er þeim ekki hampað vel og rækilega og þær gagnrýndar og ræddar, í staðinn fyrir að tala í kringum efniskjarnann eins og köttur í kringum heitann graut? Vilja menn raunverulegar framfarir fyrir hinn ágæta Laugaveg, eða bara tala um þetta eins og um Amerískt beisbol lið á móti Amerísku beisbol liði?

Ef lóðirnar eru sameinaðar í eina stóra, þá er það skipulagsslys. Ef sami aðili byggir og hannar á einni stórri lóð í stað tveggja smærri, þá er það skipulagsslys. Ef eigandi ræður tvo aðskilda aðila til að byggja á sitt hvorri lóðinni sem aðskild verkefni, þá er það rétt formúla og ágætis byrjun með árþúsunda skipulagsreynslu að grunni. Þá er að fara í saumana á hvaða áhrif hin nýju hús hafa, hvernig þau eru útfærð, hæð etc etc. Enn og aftur vantar hvaða lausnir er verið að ræða. Hvaða lausnir eru þetta og hvar er umræðan um þær?

Nýbyggingar eru nefnilega ekki framfarir. Það sést um alla borg. Reyndar víðsvegar um land allt. Sumar nýbyggingar eru framfarir, aðrar ekki. Vonandi verður ekki stórslys á Laugaveginum!

Því vil ég sjá hvaða framfarir er verið að stinga upp á. Svo er að vega og meta hvort það séu í raun framfarir eða ekki, og meta út frá því hvort það séu nægilegar framfarir til að réttlæta niðurrif eða flutning á gömlum húsum sem hafa oftast mun ítarlegri sögu en skráð er á blað.

Fá frest til að mótmæla friðunartillögu