Halló vín á Halloween, svo er bara bless vín og timburmenn.

Í kvöld er Halloween í Bandaríkjunum. Ekki byrjaði það vel, því LIlja endaði uppi á slysavarðsstofu og fékk þrjú spor á sár á enninu. Við vorum svo að fara rúntinn í blokkinni hér í New York, Lilja með poka sem fylltist af nammi og allskonar goodies. Fólk uppklætt eins og trúðar og skrímsli með horn. Sama dag eru íslendingar að storma áfengisverslanirnar, mætti halda að sé halló-vín dagur. Sem það er. Amerísk áhrif? Á morgun er svo bless-vín dagur og allt fjörið búið með hækkandi verði og lækkandi sól. Einu Hallóvín skrímslin sem eftir verða eru þá þessi timbraði í speglinum og kosningaplaköt af Víetnamamorðingjanum McCain.

Örtröð í verslunum ÁTVR

Nýtt listaverk frá ungri listakonu.

Hér er nýleg mynd gerð af Lilju Önnu sem er fjögurra ára. Þetta sýnir hús með strompi, reyk, ský, regnbogi, fiðrildi og stúlka að rækta ástarblóm. Geri fullorðnir betur!

Er hægt....

Er einhver sem veit hvar ég get fengið að sjá grunnmyndir af þessu húsi nýs listaháskóla? Hingað til hefur maður aðeins séð götumynd af kassastafla og svo innimynd af einhverju holi/molli, en eru á lausu grunnmyndir sem sýna skólastofur, ganga-layouts og allt það?

Einn áhugasamur. 

Deiliskipulag nýs Listaháskóla senn auglýst

Krónan?

Björgúlfur, hinn mæti útrásarmaður, styrktaraðili listalífs og skurðgoð frjálshyggjupostulana segir í viðtali að krónan hafi verið mesta vandamálið. Maður veltir fyrir sér hvað býr að baki svona orðum, því ég veit ekki betur en að krónan hafi verið óvenju sterk og íslendingar getað veitt sér hluti fram yfir það sem er normið, vegna þess að krónan hafi verið góður gjaldmiðill. Og svo hefur maður heyrt að ýmsir hafi þénað drjúgt á krónunni í gegnum viðskipti. Stundum kemur gengisstaðan sér vel, stundum ekki. Soddan er det min ven.

En einhvern veginn held ég að þetta sé frekar grunn útskýring. Krónan er bara krónan okkar. Vandamálið hefur frekar verið ákveðið hugarfar sl. áratug með að allt sé falt, að í lagi sé að veðsetja upp í topp, selja fyrirtæki fram og aftur til að auka verðgildið og veðsetja meira, taka meiri lán og það er líklegast svona óábyrg græðgisvæðing og brask sem hefur eyðilagt hlutina frekar en krónan. Að húsnæðisverð hafi fjórfaldast í verði er risastór afturför í þjóðfélaginu. Að fólk sé að borga í áratug af íbúð sinni og höfuðstólinn sé sífellt að hækka í krónutölum, það er vandamálið. Þetta er eins og að leigja íbúð einhvers staðar og taka úr henni eldavél og arinn áður en henni er skilað aftur til eiganda. Bankar orðnir hinir nýju lénsherrar, það er vandamálið. Almenningur orðnir þrælar bankanna og allur þessi píramídi byggður úr sandi og leiktjöldum... og allir á leiðinni á hausinn... Að Ísland skuldi tífalda árlega þjóðarframleiðslu, það er vandamálið. Ég held það hafi lítið með krónuna sem slíka að gera, heldur viðskiptamáta sem hefur til langs tíma ekki meikað sens, brask er alltaf bara brask, sama hvernig við lítum á málin. Frjálshyggjan var alltaf skipbrot og sjálfsblekking. Ef menn notuðu viðskiptamódel sem ekki gengu upp með krónunni, af hverju voru þau viðskiptamódel notuð til að byrja með? Sem sagt ef á móti blæs, þá kolfellur spilaborgin út af krónunni? Maður bara spyr hver er byggingarmeistari slíks furðuverks?

Viðskipti, þjónustur og framleiðsla eru undirstaða. Las Vegas og verðbréf eru brauðfætur; aðferðafræði sjálfsblekkingarsjúkra. Nú erum við að fá gígantískt lán til að dekka hin lánin sem voru tekin til að dekka hin lánin sem voru tekin til að dekka hin lánin sem voru tekin til að... Hvar endar þessi della eiginlega, og er þeim gróðafíklum sem komu okkur í þetta vandamál treystandi til að koma okkur úr því? Ég held nú ekki!

Breytingin sem þarf að koma núna felst ekki í krónunni sjálfri. 

Ég held að vandamálið útskýrist miklu  frekar í að bankarnir hundsuðu sífelldar viðvaranir að utan. Ekki fyrir svo löngu síðan voru "Danir að reyna að eyðileggja íslenska banka!" Helvítis Danirnir. Eða hvað? Fyrir 3. árum var Royal Bank of Scotland að reyna að eyðileggja Ísland með sinni raunhæfu skýrslu um brauðfótamál íslensks efnahags. Umræðan er í raun á grátbroslegum forsendum. Fyrirmenn bankanna áttu að vera fremst í röð til að hlusta vel á ráðgjöf fjármálastofnana að utan en þeir hafa brugðist, í einhverjum PR leik í fjölmiðlum, leik með snöru, sífellt að gera hana lengri og lengri með "Áfram Ísland!" frösum. Og svo hlógu þeir og borguðu hver öðrum laun sem voru MILLJÓN á dag. Þar er myndbirting vandamálsins.

Svo má nú segja eins og er að menn eiga að haga sínum viðskiptum á þeim útgangspunkti sem tekur m.a. mið af því að Íslendingar nota krónuna. Ekki miða við að krónan sé vandamálið. Sumir hafa gengið svo langt að vilja taka upp enskuna. Nú er spurning hvort við þurfum ekki að taka upp frystinguna og frysta eignir þeirra sem tóku sér há laun fyrir að sofa á verðinum?

Kannski er allt þetta bara fyrirsögninni að kenna.

 

Meðfylgjandi mynd er af verki mínu "Kaffibolli nýfrjálshyggjunnar" 2004, úr steypu. (Einkaeign safnara í London).

Krónan stærsta vandamálið

Vinstri mönnum er ekki treystandi fyrir fjármálum.

Man einhver eftir þessum frasa? Þessa dagana kemur vel fram hvaða bull þetta hefur alltaf verið.

Íslenskar bankaeignir á útsölu

Útlendingum að kenna eða bröskurum? EINKAVÆÐUM BANKANA!

Það má vel vera að erlendar stofnanir séu að reyna að fella íslenska banka. Kapítalisminn sýnir enga miskunn.

En svo er nú aðal vandamálið þessi gríðarlega uppsöfnun skulda. Ef einkabankamenn hefðu ekki tekið svona ótæpilega mikið af lánum þá hefðu þeir ekki komið þjóðinni í það klandur sem nú er staðreynd. Lán vegna uppbyggingar virkjana eða iðnaðar eru fjárfesting. Lán til að framfleyta sér benda til að ekki sé allt í lagi. Getur gengið til skemmri tíma.

Fullt af fólki í BNA hefur komið sér í kreditkortaskuld með því að lifa flott eða notað kreditkort í neyð til að fleyta sér yfir tímabil eða borga sjúkrareikninga o.s.frv.. Það endar oft í persónulegu gjaldþroti og bankastofnanir byrja á að koma í veg fyrir frekari lántöku. Það er eðlileg ráðstöfun.

Að taka lán til að borga lán er ekki hægt til lengdar. Að taka lán til að borga lán til að borga lán til að borga lán til að borga lán endar með ósköpum!Hver var að segja að "ekki treysta vinstri mönnum fyrir fjármálum"?

Einhver segir stopp og ekki endilega hægt að kenna þeim um. Einkavæðing bankanna hefur mistekist. Einkarekstur er ekki sjálfkrafa betri en ríkið. Skoðun sem stendur óhögguð hjá mér Íslenskir braskarar hafa einfaldlega ekki staðið sig nema í að gefa sjálfum sér vænar fúlgur fjár.

Hvað lærum við af þessu? ALDREI treysta braskara. Aldrei.

Þeir felldu bankana

Afturhaldssemi í kaþólskum löndum.

Ég fór í fermingu hér í USA um daginn, í kaþólska kirkju. Verð að segja að ruglið sem kemur úr þessum prestum ríður ekki við einteyming. Eins og hálfs klst ræða um algert bull, helvíti og bannað að hafa samfarir, "einn plús einn eru þrír." og vinir sem eru í dópi "eru djöflar" og homma bíður eilíf steiking á ristateini satans. Þvílíkt blaður. Skömm að því að ala börn upp í svona dellu, þau eru æá viðkvæmu þroskastigi og þurfa rökréttari fyrirmyndir en svona kreddukalla. Einmitt þarna fyrir utan var virkilega dópistalegt plakat fyrir utan kirkjuna, sem á var mótmæli við fóstureyðingum.  Einhver á LSD hefur fengið að hanna það, ég tók mynd af því:

Þetta fólk er mikið á móti fóstureyðingunum. Fólk úr takti við að raunveruleiki er fyrir utan túlkun þeirra á biblíunni. Hjá flestum konum er fóstureyðing alls ekki léttvægt mál. En það er einmitt einkamál konunnar sem á í hlut sem skiptir mestu máli. 

Fóstureyðingar eru gerðar á fyrstu vikunum, þegar leikmaður sæi lítinn sem engann mun á fóstrinu og fóstri skyldra spendýra.  Málið er að fóstur er ekki orðið nógu þroskað til að vera mannvera fyrr en miklu seinna á þroskaskeiðinu. Við getum því ekki rætt um fóstur svona snemma á meðgönguskeiðinu sem barn. En á ákveðnu tímabili er hægt að ræða það sem "ófætt barn."

Ég held við þurfum að gæta okkar með að vera með eða á móti fóstureyðingum almennt. Eftir einhvern tíma á meðgöngu er grátt svæði þar sem fóstureyðing færist af ásættanlegu stigi yfir á siðferðilega óréttmætanlegt stig. 

Það eru ekki allar konur sem eru í aðstöðu til að eiga barn. Ástæður fyrir þungun geta verið svo margar og samspilandi þættir flóknari en svo að maður eigi að vera með eða móti af því maður telur sig standa á siðferðilegum stalli í gegnum trúfélag eða annað. Ástæður fyrir fóstureyðingu geta líka verið margar. Eins og mér þykir sjálfum vænt um börn.

Spánn er greinilega mikið aftur úr í þessum félagsmálum eins og kaþólsku löndin almennt. 

Fóstureyðingaskip í höfn

"Ó jú, en skuldirnar eru í einkageiranum"

Oft var mér sagt... að risavaxnar skuldir Íslendinga skiptu litlu máli af því þær "væru mestmegnis í einkageiranum. Ríkið væri skuldlaust."
Svo virðist sem tsunami ósannsögli hafi flætt yfir þjóðina á síðasta áratug. Uppgangurinn bara ein stór lygi?
Spurningin hjá mér er hverjir í raun hagnast á Íslandi á hnjánum. Eru einhverjir sem renna hýru auga til auðlindanna? Hverjir eru það? Ef svo er, er það þess virði að ríkið taki á sig allar þessar "Einka-" ábyrgðir?
Og ef bankarnir voru einkavæddir á sínum tíma, af hverju er nú þessi ríkisábyrgð, því spurning hvort þeir hafi verið einkavæddir ef eigendur bera ekki ábyrgð á "eigum sínum."
Bara spyr.

Ísland standi við alþjóðlegar skuldbindingar

Fjárfestingartækifæri á Íslandi

Til þess eru fjárfestingatækifærin að grípa þau! Nú er lag og frelsa markaðinn enn meira en komið er.

Var að segja vini mínum að hann ætti að fara til Íslands og fjárfesta. Hann gæti núna keypt sjálfa Brennivínsverksmiðjuna á einn dollar! Hann var mjög spenntur fyrir því og stakk upp á að hann gæti svo eftir nokkur ár selt Íslendingum verksmiðjuna aftur á tíu milljónir dollara! 

Þá runnu á mig tvær grímur og ég mundi eftir öðrum business díl í svipuðum dúr...  What comes around goes around.

 

IMF, Rússland... Af vonleysisstræti yfir á framtíðarveg.

Ef taka á lán til að koma okkur fyrir hornið af vonleysisstræti yfir á framtíðarveg, þá tel ég skynsamlegt að taka 50% frá Rússum og 50% frá Alþjóðabankanum/IMF. Við skulum muna að síðastnefnda batteríið hefur verið í ráðgjöf um heim allann en með misjöfnum árangri (Argentína t.d.). Rússar væru örugglega ánægðir að koma öðrum fæti fyrir hér, svo það yrði að ske með fyrirvara. Best er að dreifa láninu á sem flesta aðila svo Íslendingar verði í betri samningsstöðu þegar fram líða stundir. Segi 50/50.

Og ef verið er að taka meiri lán til að stand við skuldbindingar vegna gríðarlegra lánaskuldbindinga, þá þarf að stokka upp í kerfinu all rækilega. Spurning hvort þeir sem hafa verið að stjórna séu hæfir til að stjórna héðan af. Þeir sem hafa hagnast mest á kerfinu, sem hefir formlega liðið undir lok, eiga ekki að vera hluti af lausninni. Það þarf skýrari lög með fjárfestingar og arðsemi og... að minnka lántökur. 

Ef bruðl einkabraskara er ekki minnkað munum við skjótt fara fyrir horni yfir á vonleysisstræti aftur. 

Ekkert liggur fyrir í Moskvu

Ruglustrumperí á afþreygingaskjám flugleiðavéla. Með handhelda tólið í cockpittinu.

Fyrir um tveimur vikum flaug ég með Flugleiðum og settist í sætið. Við tókum strax eftir að búið var að setja LCD skjái í stólbökin fyrir framan okkur. Ja þetta litla, það er aldeilis stíll í þessu hjá þeim. Svo þegar farið var af stað heyrði ég fuglahljóð. Mér datt í hug að ég hefði enn eina ferðina fengið mér of marga bjóra. Ómögulegt að fugl hefði komist inn í vélina, en mundi þá að vinur minn Skúli Sverrisson tónlistarmaður sagðist vera að vinna í einhverju svona verki fyrir Flugleiði. Skemmtilegt það og frumlegt.

Svo fór ég að fikta í þessu tölvudóti, enda ekki hægt að vera með takka beint fyrir framan sig án þess að ýta á þá. Þarna var ýmis konar afþreyging sem getur komið sér vel ef manni leiðist hrikalega.  Að vísu ekki vandamál hjá mér.

En eftir að hafa skoðað undrin í smá tíma kom ég auga á ýmis furðulegheit. Fór þá að taka myndir af skjánum, ýmislegt þar sem er þess virði að staldra við og skoða. Hér eru þrjú strumpaatriði:

Einn skjár var með tímanum til New York, upplýsingar beint frá flugmanninum myndi maður ætla. Það var alveg svakalega langt, eitthvað um tólf tíma flug! Í raun er það nær fimm tímum en skjárinn gaf alltaf upp einhverja dellu. Hér sést hvar eftir eru 8 klst og 25 mínútur af fluginu. Það var eitthvað nær klukkustund frekar en hitt, sem betur fer. Gat ekki verið að það tæki yfir átta klukkustundir að fljúga þúsund kílómetra. Ég hjóla hraðar!

 

 Hér er svo skjámynd af leikjaprógrammi. Hægt er að hætta með því að snerta >BOINK hurru vantar orð mar!< í horninu efst. Maður þarf að hafa stýripinna til að geta spilað leikina, allt í lagi. Eitthvað hefur verið þýtt yfir af ensku og hér eru ensku-áhrifin sem eyðileggja máliðp okkar komin skýrt fram: Handheld tool er þýtt sem HANDHELDA. Ekki nóg með það, heldur er verið að tala um handhelda tólið. Vonandi þarf það ekki að vera vatnshelt líka.
Ég ákvað að spila ekki þennan leik, enda væri maður verið handtekinn fyrir perraskap ef flugfreyjurnar sæu mann að "nota handhelda tólið." Góð þýðing á þessu, góð fyrir "peep show" en full djörf fyrir siðvanda.

 

Svo þykir mér traustvekjandi mjög að vita að flugstjórinn veit sko hvert hann er að fara og hvað lengi er verið að fljúga þangað. Gaman væri líka að fara í þessari vél til Vestmannaeyja, því nú tala allir Sænsku í Vestmannaeyjum, Ja ja pratta Svenska í Vestmannaaugor. Góðir í landafræðinni líka, þessir sem settu upp þessa mynd. Tærasta snilldarverk, ef ekki bara listaverk.

Nú er bara að vona að flugstjórinn sé ekki skyldur þeim. Með handhelda tólið í cockpittinu.

 

Er Ísland með þróað hagkerfi?

"Tekið verður tillit til þess að Ísland sé þróað vestrænt ríki með þróað hagkerfi" segir í frétt viðræðna Íslendinga við IMF.

Þessi setning greip mig einhvern veginn. Hvernig getur hagkerfið verið svona þróað þegar skuldir eru tíföld þjóðarframleiðslan og þjóðin á hausnum út af braski? Margfaldað húsnæðisverð og fólk að klyfjast með lán sem síhækka frekar en lækka? Er hundur það sama og kýr? Er það þróuð raketta sem brotlendir?

Í þróuðu hagkeffi myndi maður ætla að væri jafnvægi í peningamálum og  gullegg þjóðarinnar gerð til þess að standast mikinn öldugang í fjármálaheimi erlendis. Menn hafa verið að segja að skuldirnar séu "allt í lagi af því þær eru í einkageiranum." Þessi lygi bergmálar innan um aðra endalausa froðusnakks-frasa nautheimskra markaðshyggjumanna, sem halda að ný-frjálshyggjan sé nýjasta testamentið. Ísland er ekki með þróað hagkerfi meðal annars af því að markaðshyggjan hefur í svoldinn tíma verið einvaldur og spillingin tengd í hana er á of háu stigi. Ef við tengjum saman helstu peningaforkólfana myndum við fá út mynd af mafíu, sem er eins og skuggar á bakvið þá sem við erum að kjósa á þing út af auglýsingaskrumi eða jafnvel sjá mafíósana upphafða í fjölmiðlum.

Ég hef á tilfinningunni að lánið frá IMF muni þjónka markaðshyggjudellunni enn frekar. Og að við séum að fá lánaða lengri snöru. Það sem þarf er ný sýn á framtíðina, ný takmörk með heildina að ljósi, ekki sjálfsdýrkunarsýki peningaperverta í jakkafötum. Aukið ríkisaðhald og endurskrifaðar reglur og lög um fjármál, um sölur á fyrirtækjum. Það þarf að ramma inn viðskiptageirann að skynsamlegu marki og opinbera hverjir gefa peninga í stjórnmálaflokka. Það þarf að stokka mikið upp og gefa venjulegu fólki séns á að fúnkera án þess að þurfa að vera í hlutverki mannskemmandi "bisniss gæ" alla daga. Maður fagnar ríkisvæðingu bankanna en efast um framhaldið.

Kannski þurfum við endurbætta stjórnarskrá?  Ef yfirvofandi gjaldþrot þjóðarinnar út af viðskiptasvindlum (píramídasölur á fyrirtækjum) gefur ekki tilefni til, þá held ég að ekkert geri það. Eða erum við fær um að takast á við slíkt? Það er ekki einu sinni til almennilegt nýlegt borgarskipulag þó allir þykist vera sérfræðingar í því þessa dagana. Fara jafnvel í business skóla til að læra slíkt, kannski ekki skrítið að borgarskipulagið sé jafn van-þróað og raun ber vitni, við erum ekki með þróað borgarskipulag heldur. Það virðist versna eftir því sem "sérfræðingunum" fjölgar. Eins og í fjármálakerfinu.

Jæja, nóg af mínum skoðunum lofa að hætta þar til sú næsta kemur. 

Fundað stíft með IMF

Afneitun markaðsfíklanna. Ekki Davíð að kenna.

"Davíð að kenna!" hrópa menn. En hvað þetta er þægileg og auðveld útskýring. Maðurinn sekkur þjóðarskútunni einsamall af því hann hatar einhvern hóp manna. Trúa menn þessu? Ég á erfitt með að gleypa þetta.

Ég man ekki betur en að í gær tækju Bresk stjórnvöld yfir ýmsa reikninga Íslenskra banka. Útibúum bankanna lokað í nokkrum löndum. Bretar eru með miklar aðgerðir sjálfir til að redda sínum málum og bankar þar heimta auðvitað pening frá bönkunum burtséð frá hvað Davíð segir. Og lánshæfnin var lækkuð mikið, enda allir einkavinavæddu bankarnir á kúpunni. Alvarlegt mál. Það gengur ekki að viðhalda einhverri lygi með að "allt sé í lagi," þegar það er það ekki. Það er ekkert langtíma gagn í lygalaupum eða taka þátt í þeirra sjálfsblekkingum. "Látum eins og allt sé í lagi og þá reddast þetta, strákar!" í miðri lausafjárskreppu á heimsvísu. Nei lygar gagnast ekki nema fyrir loddara.

Þá má spyrja sig hvers lags banki er þetta eiginlega sem hrynur þó einhver einn maður segi eitthvað? Halda mann að svoleiðis fyrirtæki sé traust? Nei, ég myndu kalla það banka á brauðfótum!

Ég er sko langt í frá einhver sérstakur aðdáandi Davíðs. en á erfitt mað að trúa að hann hafi svona gríðarlegt vald og sé svona niðursokkinn í eigin samsærisplönum eins og markaðsfíklar í sjálfsafneitun vilja vera láta. Þar fyrir utan hlýtur Davíð að taka ákvarðanir sem eru byggðar á ráðgjöf hans starfsmanna, hagfræðinga og annara. Hann er nokkuð augljóslega blóraböggull frjálshyggjutrúhópsins, sem nú hefur beðið mikið skipbrot og landsmenn munu líða fyrir -til margra ára. Það dugir ekki að benda fingrum á einn mann, heldur er á ferð töluvert stór hópur manna sem hefur byggt upp sandkastala í ímynd frjálsrar markaðshyggju -sem gat ekki tekið öldugang.

Og nú tekur við erfitt tímabil fyrir marga.

Staðreyndin er að þegar kreppir að, þá hafa frjálshyggjumusterin hrunið eins og spilaborgir. Maður hefði ætlað að fjárhagsplön landsmanna væru á betri grunni byggð en þetta, en ætli það sé ekki það sem skeður þegar yfirstjórnin er takmörkuð, græðgin er skynseminni yfirsterkari og lygar og sjálfsbekking ráða ferðinni í staðinn fyrir heilbrigða skynsemi. Og þegar menn lesa Milton Friedman eins og trúarnöttarar lesa biblíuna.

Spurning hvort ekki eigi að gefa öllum yfirstjórnendum KB kauphækkun fyrir framúrskarandi frammistöðu?

 

FME yfirtekur Kaupþing

WORLD economy in biggest financial crisis since the 1930s.

"The world economy is entering a major downturn in the biggest financial crisis since the 1930s, said the International Monetary Fund (IMF). In a hard-hitting report, the IMF warned the global economy was facing its most dangerous crisis for 70 years. World economic growth will slow substantially this year, and only pick up modestly later in 2009, it said." BBC frétt. 

Svo þessi mál eru öll í stærra samhengi.

Ég vann fyrir mörgum árum á gríðarstórri arkitektastofu í New York. Kona sem sá um helstu fjármálahliðar fyrirtækisins var persónulega á kafi í verðbréfunum og öll á iði yfir hækkunum og lækkunum. En þegar ég fór að tala betur við hana kom í ljós að hún notaði bara AUKApeninga í verðbréfin. Hún leit á þau eins og spilavíti, hennar orð, maður tapar stundum og vinnur stundum. Henni datt ekki í hug að setja meginfé sitt í verðbréfin eða taka neina áhættu, sagði slíkt fólk ekki vita hvað það væri að gera."It´s like Las Vegas, only certain types gamble all they have on stocks. If you´re sensible you use your spare change." En henni fannst þetta óskaplega spennandi.

Mér koma alltaf orð þessarar konu til hugar þegar ég heyri að menn tapi gildi verðbréfa sinna. Það er jú áhætta í þessu, ekki gulltrygging. Það er áfall að missa peningana sína, fer nú líka svolítið eftir því hvar þú hefur verið að setja þá sl. árin. Það getur þrátt fyrir allt verið betra að fá bara 5% vexti á sparireikning.

Harmleikur allrar þjóðarinnar

Stuttbuxnadeildin með allt niður um sig.

Eftir stórræður sl. áratugs um að ríkið eigi ekki að skipta sér af viðskiptum eða einu eða neinun er komið í ljós að allir hanga á hor-reim í pilsfaldinum á blessaðri fjallkonunni, ríkinu, og vænta þess að hún bjargi unglingunum eftir lánsfylleríi sl. ára. En fjallkonan er ekki í góðum holdum sjálf, unglingarnir búnir að sitja að henni og nærast á henni af miklum eldmóð. 

Frjálshyggjan hefur beðið skipsbrot eins og var spáð. Í stýrishúsi öfgastefnunnar eru Hannes Hólmsteinn skipstjóri í bláum stuttbuxum, og aðrir boðberar þessarar stefnu í hlutverki presta, með fánaveifur að heimta skólagjöld og vara við að ríkið sé alslæmt og af hinu illa. Að ríkisstarfsmenn séu aumingjar, og að nú skuli frelsa sjálfann markaðinn sem á einhvern veginn að vera besti vinur okkar. Þessir menn hafa verið að endurvekja draugalegann boðskap í BNA frá þriðja áratug, þegar þrír Bandarískir forsetar í röð tóku þátt í að boða frjálshyggju þeirra tíma, lækkun skatta, einkavæðingu, frelsun braskara og allt það. Áður en botninn datt úr vitleysunni.Þá þurftu menn aðeins lengra til vinstri að reisa verkið upp aftur, enda er hægri mönnum ekki treystandi fyrir bókhaldinu heldur.

Um borð er líka hellingur af bröskurum, sem eins og rottur munu verða fyrstir til að yfirgefa þjóðarskútuna ef vatnið fer að fossa inn. Sumir munu grípa sér-merkta björgunarbátana og flýta sér í burt. Og á endanum munu þeir alltaf vera í afneitun og kenna ríkinu um allt sem miður fór hjá þeim sjálfum. Eins og alkóhólisti sem kennir maka um drykkjuna. Bankaræningjar munu benda á ríkið og hrópa "bankaræningi!" Lygaþvætting ber að sama brunni, trúarofstæki mun aldrei viðurkenna það sem sannara er og einhvern tímann munu vitleysingarnir koma aftur þegar hægt er að plata næstu kynslóð í trúflokk sem einkennist af bláum stuttbuxum og loforðum um gull og græna skóga.

En ég hef ekki áhyggjur af þeim.

Það fólk sem ég hef áhyggjur af er venjulegt fólk, fjölskyldur sem eru í skuldasúpum, eiga á hættu að missa þakið ofan af sér, fólk sem hefur verið gabbað í stórar lántökur í gegnum auglýsingaskrum og braskarafroðusnakk í ráðgjafadeildum fjölmiðlanna eða bankanna. Ísland var komið í fyrsta klassa þegar ég var unglingur, ca 1980. Þða var lífið bara ágætt ef segja má eins og er. Braskið sl. áratug hefur ekki fært landinu neina byltingu en tækniframfarir hafa gert það. Það sem hefur jú verið kjarninn í góðu Íslensku lífi er ákveðið stabílitet, að börn hafi nægt rými til að vaxa og dafna í þroskaða eintaklinga, fái frið fyrir áræti og þurfi ekki að líða fyrir neikvæðum umhverfisaðstæðum eins og rukkarar að trufla foreldra á leið á hausinn eða atvinnulausa foreldra. Eða auglýsingaskrumi sem er að sjálfsögðu afvegaleiðandi. Ég hef áhyggjur af þessum breiða hóp og þeim atvinnurekendum sem hafa verið í heiðarlegum rekstri, framleiðslu, gjaldeyrismyndun og sjá nú fyrir endann á sínum rekstri.

Jæja þetta er bara mín skoðun. Gangi ykkur vel á Íslandi.

Forsætisráðherra flytur ávarp

Sunnudagskvörtun

Nú hef ég á sl. mánuðum verið þeirrar ótaminnar hamingju njótandi að þurfa að hlusta á Bylgjuna langtímum saman. Mikið er furðulegt þegar íslenskar hljómsveitir eru að apa eftir erlendum hljómsveitum. Þessi nær Pink Floyd, þessi Eagles, þessi syngur eins og Bob Dylan og þessi nær Eric Clapton. Hvað er eiginlega íslensk tónlist?

Svo kveiki ég á íslenska sjónvarpinu og þar blasir við mér stílismi amerísks sjónvarps. Sem ég er löngu hættur að horfa á, ekki að ég hafi eytt löngum stundum í það. Amerísk gildi í hnotskurn, keimlíkir umræðuþættir og nú síðast íslenskur Hollywood verðlaunaþáttur með slaufubindi og smóking. Svo eru endalausir amerískir þættir sem snúast aðallega í kringum uppáferðarsenur Bob Billy og Bobby Joe, Britney Houston nýbúin að strauja á sér hárið, hrært saman við blóðbað ofbeldissena, öskurs, mannvonsku og æsings sem margir virðast fá kúl kikk út úr. Hækkað er í hljóðstyrk þegar auglýsingar byrja, þær eru látnar móta kúltúrinn og árangurinn er eftir því. Bílaútsölur með tilheyrandi fánaveifum. Eftirherma amerísks sjónvarps. 

Spurning hvort þessir hlutir endurspegli ekki einmitt gildi þjóðfélagsins? 

Og að eftiröpun sé Ísland í hnotskurn?

Sósíalisminn að venju hentugur fyrir fjárfesta

Er svo sem ekkert ósammála þessum aðgerðum, en það fyrsta sem mér datt í hug er að að venju hentar sósíalisminn vel fyrir fjárfesta hér vestra, en almenningur í sama landi virðist ekki eiga eins greiðann aðgang upp á pallborðið fyrir svipaða þjónustulund af hálfu hins opinbera. Auðvitað er þetta allt saman spurning hver stjórnar á bak við tjöldin, líklegast ekki lýðurinn eins og sumir virðast halda.

Þannig að "markaðs-upp-kippurinn" í morgun á sér sínar útskýringar: Ríkið bjargaði deginum, ekki markaðsöflin.

Rockefeller eldri orðaði þetta eitthvað á þá leið að vitleysingarnir heimtuðu lægri skatta en þeir greindari lærðu að mjólka kerfið.

Bandaríska ríkisstjórnin tilkynnti nú síðdegis, að hún hefði tekið yfir stjórnina á fasteignalánasjóðunum.

Bandaríska ríkið yfirtekur fasteignalánasjóði

Færsla flugvallar væri afturför í samgöngum!

Flugvöllinn í Reykjavík, takk fyrir. Hef verið á Seyðisfirði í allt sumar og nota flugið töluvert frá Egilsstöðum. Vélarnar næstum alltaf troðfullar! 

Það væri heldur betur óhagkvæmt ef lóðabraskarar fengju sínu framgengt og flugvöllinn til Keflavíkur. Ekkert ósvipað og ef Kaupmannahafnabúar færðu Hovedbanegarden 50+km út fyrir Kaupmannahöfn. Það sér það hver sem lítur yfir skipulagsmál að slíkt væri fásinna hjá Dönum. Rétt eins og þessi hugmynd með að flytja flugvöllinn úr Vatnsmýrinni er glórulaus. Klukkustundarferð myndi margfaldast í tíma og það væri mikil afturför í samgöngum innanlands. Algerlega út í hött. 

Þegar ég kem frá New York og tek rútu+leigubíl frá Keflavík tekur það mig léttilega 1,5 klst bara að komast í heimahús rétt hjá Kringlunni! Þetta er staðreynd.  

Svo tek ég undir orð þeirra sem vilja kosningu á landsvísu ef það á á annað borð að kjósa. En auðvitað er töluvert rugl að vera að gera pólitískt mál úr þessu, er í raun skipulagsmál á landsvísu, flugvöllurinn er afar hagkvæmur fyrir innanlandssamgöngur og í raun ómissandi fyrir Ísland allt. Flutningur vallarins á að heyra undir skipulagssérfræðinga, enda lógískt mjög að hafa hann á sínum stað.

Það sem þarf er almennileg samgöngumiðstöð í Vatnsmýrinni, stækkun á flugstöðvarbyggingum, bættri aðkomu bíla og að kúpla strætó beint fyrir framan flugstöðina.  Í Vatnsmýrinni.

Vill láta kjósa á ný um Reykjavíkurflugvöll

Hundsa blýantsnagarana?

Er ekki deginum ljósara að byggingarlánasjóður er sökksess og brýn nauðsyn hér á landi, og að best sé að hundsa tilkynningar erlendra blýantsnagara?

Stendur Íbúðalánasjóður á krossgötum?

Þar sem tvö bjarndýr eru, þá geta verið þrjú. Lausleg áætlun.

Hvað er svona flókið við ursus maritimus málið sumarið 2008? 

Veturinn 1917-18 gengu á land 27 dýr. 1880 gengu á land 63 dýr. Af hveru dregur Húnavatn nafn sitt? Kemur hafís aftur? Jú jú. Ganga dýr á land á þessari öld? Að sjálfsögðu.

Hér er lausleg áætlun yfir það sem mætti gera, ef menn vilja bjarga þessum dýrum:

1.  Búr. Hafa tiltæk tvö góð búr í húsi björgunarsveita á Sauðárkróki eða Blönduósi, eitt á Ísafirði og eitt á Húsavík. Að smíða svona búr er frekar einfalt mál og létt að koma þeim fyrir á pallbíl.  

2.  Svefnlyf. Á sömu stöðum hafa tiltækar þar til gerðar byssur með svefnlyfjum. Lyf endurnýjuð annað hvert ár eða eftir því sem þarf.

3.  Bangsalögga. 2-3 menn á hverjum stað sem þjálfaðir eru á þessar byssur, bara hluta af björgunarsveitum. Þeir geta þjónað vakt-hlutverki um leið og bangsi finnst, með svefnlyfjum og venjulegum skotvopnum ef með þarf. Það nægir að hluti af björgunarsveit viti hvað eigi að gera og hafi vilja til þess. (Best er að hafa eina til tvær góðar skyttur sem sérhæfa sig m.a. í þessu en eiginlega vantar umgjörð utan um slíkt). 

4.  Flug út. Tengsl í náttúruverndarsamtök erlendis sem geta náð í bangsa strax eftir að honum hefur verið ekið inn á einhvern flugvöll.

Mál leyst, með tiltölulega lítilli fjárveitingu frá alþingi fyrir búrum, byssum og deyfilyfjum. Eru það tvær milljónir í grunnkostnað? Nema ef ekki verði náð í dýrin, þá er spurning með hver á að fljúga með þau, og hvert eða hvort...

Kveðja frá Seyðisfirði. 

Ólafur Þórðarson 

Erfið aðgerð framundan að Hrauni