Trúflokkur geldrar hugmyndafræði lætur heyra í sér.

Enn einu sinni kemur tilkynning úr arnarhreiðrinu í borðtenniskjallaranum við Háaleitisbraut, um að nú megi alls ekki banna að selja eitthvað. Af því það er ljótt að banna sölu á ánetjandi eiturefni sem drepur fleiri Íslendinga en arnarungarnir kæra sig um að skoða. Já það eru mannvitsbrekkurnar sem hampa jólasveininum Milton Friedman það blint að ekki skiljist þegar eitthvað sem drepur sé best sett alveg til hliðar.

Samfélagslegi kostnaðurinn er auðvitað í ástvina- frænda- frænku- maka- afa- ömmu- og barnamissi. Þegar tugþúsundir íslendinga heyja dauðastríð vegna sígarettureykinga þá er auðvitað tími til kominn að vakna upp úr frjálsmarkaðssleninu og þroskast svolítið. Eða... á einhver frjálshyggjudrengjapabbinn umboð fyrir sígarettum?

Heimdallur andvígur sölubanni á tóbaki

Er þetta hægt?

Já maður bara spyr: Er þetta hægt? Er svona hægt?

Hraðakstur í Vestmannaeyjum

Orkupistill. Hvað á að gera við orkuna?

 

Hvað á að gera við orkuna?

1.  Úrvinnsluiðnaður -er það betri framtíðarsýn og stabílli? Búa til stuðara og annað dót? Skilar það meiri arði eða krefst það ekki einmitt ódýrs og nægs vinnualfs? Og það, N.B. er ekkert endilega orkufrekur iðnaður og getur því vel þrifist við hliðina á álveri

2.  Gróðurhús "Kálver" -einhverjir haldbærir útreikningar til? Sparar það handan innflutnings á grænmeti og einhverjum ávöxtum? Mér líst mjög vel á sjálfbærni í grænmetis-og ávaxtaræktun. En værum við samkeppnishæf erlendis við löndin með ódýra vinnuaflið OG enga þörfina fyrir gróðurhúsaviðhald eða að greiða upp þá fjárfestingu sem virkjun er?
Ætli það. Það er lenskan að halda að menn geti orðið heimsins bestir uppúr branding kjaftæðinu einu saman. Enda næg dæmi um útrás sem fer út með hávaða og látum og kemur eins og aumingi aftur heim. Svona gróðurhúsadæmi tekur marga áratugi að þróa en er ekki vitlausara en hvað annað. Reyndar hefur það verið í þróun marga áratugi með góðum árangri í smærri skala. En er rétt að gera gróðurhús að stóriðju? Smíða (rándýra) virkjun til að búa til mega- gróðurhúsasvæði? Hver yrði einokunarstaða þess á innanlandsmarkaði og hvers konar aðilar myndu ná undir sig grænmetismarkaðnum? Myndu núverandi smábændur í gróðurhúsafaginu detta upp fyrir og allir fá agúrkurnar úr Kálverinu? Ég bara spyr því ég hef mínar efasemdir þó hugmyndin finnist mér hljómfagurt pólitískt yrkisefni.

3.  Túrismi? Er ekki kominn nægur átroðningur? Eru ekki komin næg landspjöll af túrisma líka? Verið er að tala um að rukka inn á svæði vegna átroðnings. Geysir t.a.m. er orðinn hálf lágkúruleg hamborgara og túristamjólkurbúlla sem maður sneyðir hjá. Stopp við vegaútskot eru oft út-skitin með klósettpappír og mannaskít þar sem maður ætlaði í berjamó. Enginn er fullkominn. En tími er til kominn að endurmeta túrismann og skoða og hlúa að því sem er vel gert og laga það sem er að skemma landið. Jafnvel takmarka túrisma á átroðningssvæðum?

4.  Öll egg í sömu körfu... eru ekki fiskveiðar, túrismi, stóriðnaður 3 egg af fleirum? Er ekki skoðað það sem skilar mestu $$? Hvar eru hagnaðarútreikningar af "óverptu eggjunum"? Ekki braskaraútreikningar eins og í bankadellunni eða semi-akademísku kjánarugli, heldur langtíma stabílar tekjur. Ég sé ekki betur en að þá séu þegar mörg egg í körfunni. Og í raforkusölu viljum við selja erlendum aðilum sem mesta orku fyrir sem best verð. Þangað til við segjum stopp við fleiri virkjunum umhverfisins vegna og eða einhvers annars.
Hvaða iðnaður hefur þá besta möguleikann á að skila mestum gjaldeyri fyrir orkusölu? Þetta er "bottom line" spurningin, þó fleiri spurningar eigi líka að hafa stórt vægi.

5.  Gagnaver. Öllum líst vel á þetta dæmi. Þarf ekki að klára infrastrúktúrinn, öryggistengdar kapaltengingar við útlönd og slíkt? Hvað eyðir gagnaver af rafmagni í samanburði við álbræðslu?

Mig grunar nefnilega að til að gera nýja hluti þá er vel hægt að gera álver lika. Spurning um hvernig samninga og að vera raunsæ. Það sem stendur upp úr í mínum huga sem áður er umhverfislegt mat.

Því við gætum farið út í mega-gróðurhúsarækt og svo einfaldlega ekki verið samkeppnisfær á erlendum mörkuðum og dæmið niðurgreitt stórtap af ríkinu í áratugi. Er einhver með svar við þessu? Ætli það. En þeir sem bulluðu hæst munu ekki kannast við neitt og kenna öllum öðrum um.

En ég veit líka að ef við höfum eitthvað betra við orkuna að gera, þá eigum við að geta sagt upp samningum við álrisana með sanngjörnum fyrirvara.

Nú er að snúa sér að einkabílnum og reiðhjólunum.

Fækkun dauðsfalla af völdum reykinga eru afar jákvæðar fréttir.

Nú er að snúa sér í opinberum stefnum að ofnotkun einkabílsins, sem drepur fleiri en við viljum viðurkenna, og að innleiða hjólreiðanotkun sem aldrei fyrr. Það mun lengja lífið svo um munar. 

Miklu færri hjartatilfelli í kjölfar reykbanns

"Hér kemur hvönnin! Forðið börnunum!"

Flott mynd með fréttinni.

Ég fæ nú ekki skilið hvernig hvönn getur "ógnað" þegar um þvera og endilanga borgina eru hraðbrautarvitleysur frá tímum með löngu liðnum forsendum borgarskipulags og tilgangslausum "grænum" einskins manns túnum sem slegin eru án íhugunar. Hvönn hef ég einungis séð sem prýði á umhverfinu og einstaklega ánægjulegt að koma á stað þar sem fyrir er mikið af henni.

Miðað við lýsingarnar dettur manni í huga gömlu Japönsku skrímslamyndirnar, þar sem gígantískar plöntur fara um og éta menn með húð og hár með ásetning sem skrímslum einum er lagið. "Hér kemur hvönnin! Forðið börnunum!" Nei hvönnin er ein af mínum uppáhalds plöntum. Hún er meira prýði en steinsteypan og malbikið sem hefur eyðilagt svæðið sem höfuðborgin nú situr á. Hvernig væri að forgangsraða?

Og manni dettur annað í hug, að ef eitthvað fær á annað borð að dafna, þá hlaupa menn upp til handa og fóta og slátra því. Kannski ekki skrýtið að auðnirnar þrífist. 

Risahvönn ógnar

Meðvirknin í algleymingi

Stiglitz er varla kunnug öll sú umræða á Íslandi sem hefur fengið að ráða ferðinni sl. áratug, þar sem braskaravæðingin hefur verið talin GUÐ og ríkið alltaf slæmt.En hann myndi vita hvaðan hún er upprunnin; Chicago/Texas.

"Rekstur er alltaf betri hjá einkareknu."

"Ríkið er ófært um að gera nokkurn skapaðan hlut."

"Álver, rollubúskapur og fiskveiðar eru óþarfi því bankarnir skila svo miklu."

O.s.frv. voru frasar í öfgafréttum þar sem gangsterar fengu að ráða ferðinni. Jafnvel ágætar forsíður Moggans breyttust í að vera trompett fyrir fyrirtækjaáróður braskara sem voru á endanum bara að persónulega hagnast á að naga niður og veðsetja í topp rótgróin fyrirtæki. 

Umræðan hefur verið svona svart-hvít og við skulum bara gera ráð fyrir því að almennt verði hún áfram í sauðalitunum. Hæst í henni fóru Hannes Hólmstein og aðrir stuttbuxnadrengir af ýmsum gerðum. Þeir eru framvarðarsveitir þess að vilja ekki sjá að margt fólk er þjófótt, lýgur og beitir allskonar brögðum til að komast fram úr þér. Sem kolfellir einfeldinga "kenningar" Friedman og Hazlit ofl. akademískra jólasveina.

Mér þykir tími til kominn að hætta að gefa þessum nýfrjálshygjumönnum míkrófóninn og taka frekar viðtöl við pípara og verkafólk sem hefur ábyggilega mun gáfulegra að segja en það fólk sem hefur fengið misvitra menntun undir formerkjum Friedmanismans.

Þeir eyðilögðu kapítalismann

Her á Íslandi

Manni er stundum hugsað til þess hvað það hefði þýtt ef menn hefðu stofnað her á Íslandi fyrir 5 árum, áratug?

Hvað hefði það aukið skuldirnar mikið, spillinguna og gegn hvaða innrás hefði átt að verjast og með hvaða kostnaði í tilgangslausu falli meðal almennra borgara. 

Nei, þá er betra að setja pening í menntamál. Fjárfesting sem skilar meiru. 

Ísland ver hlutfallslega mestu til menntamála

Ímynd Landsbankans og krabbamein undir hagræðingatrixum.

Í stað þess að hugsa um ímyndarlógó finnst mér menn eigi að líta í eigin barm og skoða hvað það er sem þeir gerðu svona rangt til.

Öfgamennska réð ríkjum og gerir enn. Sú staðreynd haggast ekki þrátt fyrir breytingar á einhverju lógó sem einkavæðingarhálfvitar hafa gereyðilagt.  Vandamálið liggur ekki í lógóinu, heldur hugarfarinu, sem, dæmigert nokk, vill breyta ímyndinni í stað þess að rífa út sjálft krabbameinið.

Skipta um grímu í grímuballi markaðsorgíu Milton-Friedman heimskunnar, sem enn virðist fá míkrófóninn í opinberum fjölmiðlum.

Breyting á lógói er dæmigert auðvelt hagræðingartrix. Undir niðri kraumar sama bullið og sjálfsagt er best að halda lógóinu sem víti til varnaðar. Menn eiga að vinna sér upp í traust, ekki fá það í gegnum nýjar blekkingar.

Það tekur tíma, eitthvað sem gróðafíklar skilja ekki.

Erfitt að starfa undir nafni Landsbankans

Nafnleysingjagrýlublaður

Blogg og netblaður er eins og hvert annað þvaður í þjóðfélaginu.

Gróa í vesturbænum veltir sér upp úr uppáferðarsögum fólks úti í bæ og ámóta. Yfir kaffibolla, í fjölskylduboðum, á netinu eða í símanum.

Stundum les maður eitthvað af viti á blogginu. Og það er svo sannarlega ekki endilega efnið sem birt er undir nafni!

Sumir sem segja hvað mestu delluna, hafa bara ekki vit á að halda sig undir dulnefni.

Björgvin G.: „Ný vídd í nafnlausu níði“

Ingólfstorg

Fyrir mitt leyti verð ég að segja að ég hef aldrei verið neitt sérstaklega hrifinn af Ingólfstorginu. Að hluta til er það af því það dregur úr gildi Lækjartorgs sem eiginlegs torgs, Austurstræti var stíflað þar sem áður var Hótel Ísland og svo Hallærisplanið, og umferð beint inn á Hafnar og Vallarstræti á máta sem ég hef aldrei fílað.

Einnig þykir mér lítil prýði af Hlöllaísbúðinni. Gamla leigubílastöðin sem stóð þar var kannski betra hús.

Torgið sem slíkt virkar oft. Enda mikil þörf fyrir eiginleg torg á Íslandi. Ég er ekkert gefinn fyrir mótórhjólagengi með sína hávaðamengun. Tel heldur ekki að skateboarderar bæti neitt sérstaklega ímynd borgarinnar. En ég er hrifinn af tónleikahaldi og útisamkomum, í þeim felst styrkur borgarbúa sem sameiginlegri heild. 

Morgunblaðshöllin er náttúrulega puttinn sem potar í augað og sker upp þetta svæði sem sögulega var með mörgum smágerðum timburbyggingum. Merkilegt nokk, þessar byggingar sem í dag klessast aftan við timburhúsin tvö eru mun meira áberandi en Morgunblaðshöllin -hvað slæmann smekk varðar.

Ég hef ekkert á móti hóteli sem sliku, en  þessi tillaga er dæmigert með alltof stórri byggingu sem miðlar ekki nægilega stærðargráðum. Svo er afleit hugmynd að fara að stífla Hafnarstrætið en svo sem dæmigert fyrir þetta gatna-ruglerí sem einkennir borgar-óskipulagið.

Ég myndi alveg vera sáttur við að byggð séu smágerð hús með smágerðri starfsemi sem endurvekja smágert umhverfi og mannlegri stærðargráður. Munum að á "miðju" Ingólfstorgi stóð sögufrægt Hótel Ísland, sem því miður brann á stríðsárunum. Ég hefði ekkert á móti að skoða byggingar í slíkum stærðargráðum eða á þeim gömlu lóðum. Horfin er mikið af sögu kvosarinnar og í staðinn eru kaldir fráhrindandi stórir kassar sem ég veit ekki alveg hvað er í.

Baráttutónleikar á Ingólfstorgi

Hvað kostar þetta og er H1N1 bólusetning nauðsynleg?

Á tímum hallæris verður maður að spyrja svona.

Hvað kostar að kaupa 300,000 skammta af lyfi til bólusetningar gegn flensu sem í flestum tilvikum virðist eins og hver önnur flensa? Eða er þörf á þessu?

Ég skil að panta skammta til að bólusetja aldraða eða þá sem eru í ákveðnum hópum. En manni er spurn: Hver er kostnaðurinn, nú á tímum niðurskurðar í heilbrigðiskerfinu?

Byrjað að bólusetja í október

OECD-einkavæðingarrusls-sinnar

Held að málið sé að brosa til þessara OECD-ráðgjafa sem fæstir hafa einu sinni komið til Íslands, nema kannski á snobb hótelum í Reykjavík, hvað þá dvalið hér til að kynnast landinu. Hvernig í ósköpunum eiga svona krabbar að vita hvað eigi að laga? Að draga úr menntakerfinu? Jesús minn almáttugur. Vonandi byrja þeir á eigin börnum, svona til að sanna mál sitt.

Að taka svona stofnanir alvarlega er alvarlegt mál. Til dæmis það að stytta nám og innheimta skólagjöld í háskólann er hrein afturför og dæmigert einkavæðingarþvaður. Það sem hefur verið gott við Ísland er að landið hefur til margra áratuga haft þokkalegt opinbert kerfi sem alið hefur nokkrar kynslóðir sem hafa almennt haft það sæmilegt þó alltaf megi eitthvað snurfusa til.

En ráð frá erlendum stofnanapöddum eru varasöm ráð, þó hlusta megi á þau til gamans. Vil enn og aftur mina á að ráð frá Milton Friedmanistum eru stórhættulegur áróður og ber að taka með afgerandi fyrirvörum. Enda leynir árangurinn sér ekki af að breiða út þeóríur hans, landið á hvínandi kúpunni og atvinnu- og framkvæmdaleysi blasir framundan. Hann er vinsæll hjá svona erlendum ráðgjöfum.

 Nei, lausnirnar leynast innan landssteinanna. Ekki hjá erlendum möppudýrum.

Ábendingar snúast um pólitík

Enronsk innrás í augsýn.

Eitthvað segir mér að Ross Beaty sé maðurinn til að sparka niður hurðinni. Sem er aðgangur erlendra auðhringa að orkugeiranum Íslenska.

Smjaður og daður er eithvað sem þroskað fólk ætti að þekkja sem brögð frekar en heilagann sannleik. 

65 ár eru langur tími. Það er svo langt að við förum 65 ár aftur í tímann til að komast í seinni heimsstyrjöld. Hvernig var Ísland í seinni heimsstyrjöld og er einhver leið að segja fyrir um hvernig Ísland verður eftir 65 ár?  Jú, við getum bókað að ef erlendir auðhringar eiga orkuverin okkar og fiskinn þá eiga þeir Íslendinga.

Og jafnvel EF þessi Beaty er voða svalur og kúl gæi, þá eru svo margir aðrir í auðhringabransanum það bara alls ekki. Þeir sjá bara gróðann fyrir sig og sína. Ljúga og smjaðra og daðra til að fá "sitt." Skoðið ENRON málið og hugsa svo.

Enronskan er í innrás.  

Það er akkúrat engin ástæða að selja gullgæsina, heldur nægir að selja gulleggin, -sem eru rafmagnið sjálft.

Vilja hækka auðlindagjald

Reiðin beinist að Hannesi Hólm.

Hannes er til margra áratuga andlit frjálshyggjublaðursins og marg-skjalfest brúða búktalara og akademískra ruglustrumpa á borð við Milton Friedman eða Henry Hazlitt. Svo það er ekkert skrýtið að menn séu með horn í síðu ritara þeirrar hugmyndafræði sem nú hefur enn aftur beðið skipbrot.

Því fyrir venjulegu fólki er augljóst að einkavæðingin og frjálshyggjudellan er aðal undirrót spillingarinnar og vandans sem hefur komið upp og stefnir þjóðinni í alvarlega brælu á miðum milli Englands og Hollands.

En gott er að muna að það á ekki að beina spjótum að Hannesi persónulega, heldur taka fyrir það sem hann segir. Sem er ágætlega gert með því að berja á potta og pönnur. Oft er best að drekkja bulli í enn meiri hávaða. 

Aðsúgur að Hannesi Hólmsteini

Allar auglýsingar eru óviðeigandi í bíó.

Mín skoðun er nú þannig að ef maður kaupir miða í bíó kl. 10:00, þá á myndin að byrja akkúrat klukkan tíu og án nokkurra augýsinga.

Þetta er einfalt mál. 

Það er að sjálfsögðu óþolandi að verið sé alls staðar að valta yfir alla, börn þ.m.t., með uppáþrengjandi og sálrænt brenglandi auglýsingarusli.

Þetta er aðal ástæðan fyrir því að ég er löngu hættur að heimsækja kvikmyndahúsin, hef engann áhuga á að borga mig inn sem þáttakanda í markhópi auglýsendaskrums. Ég er reyndar þeirrar skoðunar að ef auglýsingar eru sýndar með myndunum, þá á aðgangur að vera ókeypis fyrir áhorfendur VEGNA auglýsinganna.

Undantekning gæti verið ef sýndur er trailer úr mynd sem í viðfangsefni gæti tengst þeirri sem á að fara að sýna.

En einu sinni var gaman að fara í bíó. Fyrir löngu síðan. Þá fór maður til þess að horfa á bíómyndir. Svona einfalt var þetta og svona einfalt á þetta að vera.

Auglýsa póker á Ísöld 3

Lán eru tekjur

Já eða eitthvað hljómaði það svoleiðis hjá þessum jólasveinum sem betur heldur hefðu fengið sér vinnu við að grafa skurði eða flaka fisk eins og "þetta venjulega fólk."

Svo eru fréttir um að þeir vilji bónusa og launagreiðslur sem henta einræðisherrum og ámóta pakki.

Rétt eins og í bananalýðveldum, sem Íslendingar hafa stoltir ekki talið sig hluta af, þá er braskara-toppurinn búinn að veðsetja allt í landinu fyrir eigið skinn.

Eftir situr almenningur að spóla í braskara-áróðurs-drullunni sem Hannesar-Hólmsteins-liðið hefur verið að spreyja yfir fjölmiðlana sl. áratugi.  

Fyrir mér er spurningin á endanum svona: Ætlar þú að vinna fyrir Ísland, eða á Ísland að vinna fyrir þig? 

Kv. Ólafur

Skulduðu yfir þúsund milljarða

Auðu húsin á uppboð sem fyrst!

Hvernig væri að skikka braskara sem sitja á tómum húsum í miðbænum til að setja húsin á uppboð, þar sem fjölskykdufólk (sem ætlar að búa í húsunum) fær kaupsforgang. Það er orðið ekkert lítið þreytandi að horfa upp á tóm hús grotna niður í miðbænum, ekki nokkurri borg til framdráttar.

Þetta stórskaðar ímynd allra. Og síst af öllu ber að kenna útigangsfólki um hvernig málum er háttað!

Á uppboð með þessi hús sem fyrst, komum alvöru fólki fyrir í þeim og virðum söguna sem fólgin er í þeim. Niðurrif á gömlum húsum er ekkert annað en bókabrennur í formi arkitektúrs!

Enn kveikt í Vatnsstíg 4

Alræðishyggja frjálshyggjuútópíunnar

Svona kemur þetta í ljós, peningablokkir græðginnar á endanum kaupa til sín auðkeypta lögmenn til að hlaupa erinda sinna í aumri viðleytni til að krafsa yfir blóðið í snjónum.

Ísland er spillt. Spillingin gerir þjóðfélagið eins og þessi glansandi fínu epli sem eru í fyrsta bita brún að innan og iðandi með ormum. Takk, Hannes Hólm og frjálshyggjuguttar. Takk kærlega. Alræðishyggja frjálshyggjuútópíunnar er löngu tekin yfir almenna skynsemi. Spurningin er hvernig þessu skrímsli er komið frá. 

 

Kaupþing fékk lögbann á RÚV

Að hengja bakara fyrir smið.

Það er eitt ef málningu er slett á hús útrásarvíkinga sem hafa safnað skuldabagga á þjóðarbúið í botnlaust tilgangslausu braski og loddaraskap. Það skil ég alveg.

En þó menn séu á misjöfnum skoðunum með virkjanirnar, þá eru það nú samt opinberar framkvæmdir og fjárfestingar sem verða til staðar næstu áratugi.

Þær eru gerólíkar bankaævintýrinu sem skilur ekkert eftir sig nema botnlausann mínus. Ákvarðanirnar um virkjanir voru teknar af stjórnvöldum og Landsvirkjun hefur verið verkfæri hins opinbera til að framkvæma þessar ákvarðanir. Það er því ekki persónan Friðrik sem tók ákvarðanirnar um að virkja heldur hefur það verið opinber stefna stjórnvalda. 

Maður skilur að menn eru reiðir vegna ástandisins en hér held ég að menn séu svolítið að hengja bakara fyrir smið og ekki skilja að, hysmið frá kjarnanum.

Dyr límdar aftur og málningu slett

Braskarar eyðileggja borgina.

Já maður bara spyr. Fylgir ekki ábyrgð því að eiga hús og viðhalda því skikkanlega með íbúum og þjónustu í miðborg bæjarins?

Svo standa "fjárfestingarnar" auðar svo árum skiptir og eru lýti á borginni þrátt fyrir að eigendurnir, sem búa annars staðar, máli framhliðina eins og Mussolini eða nemendur komi fyrir gluggaskreytingum til málamynda.

Hús eru til þess að mannfólk noti þau. Ég er ekki bara að meina þetta eina hús heldur fullt af húsum í miðbænum sem hafa verið á útrýmingarskrá manna með sem oftar en ekki byggja af vanviti. 

Hús í miðborg þurfa að vera notuð. Minni enn og aftur á að það er ekki húsinu sjálfu að kenna að þar er útigangsfólk, heldur eigenda, sem sneiða hjá samfélagslegri miðbæjarábyrgð með því að leyfa eignum sínum að grotna niður þrátt fyrir að mörg húsanna hafi sér einhverja merkilega sögu. 

Ef eigendur hafa ekki efni á að eiga þessi hús á að skikka þá til að selja þau eða setja bara á uppboð þar sem íbúðabyggðarvænt fjölskyldufólk eða grasrótarsamtök hafa forgang umfram aðra kaupendur.

Náðu tökum á eldinum