Sviptingar.

"....Dow Jones hlutabréfavísitalan lækkaði um 0,08%..."

Þetta kallast sviptingar á Wall Street? Er þetta frétt? Aðal hlutabréfavísitalan stendur í stað. Til hvers eru svona fréttir? Ég bara spyr, því mér sýnist Wall Street vísitölufréttir vera frekar innihaldslausar í langflestum tilvikum, nema ef litið er til lengri tíma eða ef um miklar lækkanir eða hækkanir er að ræða. 

Eiginlega finnst mér varla vera frétt nema ef breytingar eru yfir 5%.

Sviptingar á Wall Street

Óbreytt ástand? Og kamarinn?

Við fórum þarna um ca 2005 við hjónin með ömmu og barni. Þá leit þessi vegur nákvæmlega eins út, ég hélt ég ætlaði að eyðileggja bílinn á þessum bíl-eyðandi vegi.

Ekki bætti úr skák þegar ég ætlaði á kamarinn við Dettifoss. Ég hélt ég hefði upplifað margt um æfina, en þessi kamar er mér ógleymanlegur. Ég komst u.þ.b. 2 metra frá hreysinu þegar úldinn skítafnykurinn feykti mér í burtu eins og brún loftbylgja og mér varð flökurt. Mér datt í hug þá að best væri að veita ánni í allri sinni tign á þennan óskapnað og sópa draslinu ofaní  gljúfur sem fyrst. 

Ég gerði þó aðra atlögu og hélt ég kæmist að með vindáttinni en þá kom á daginn að ég hafði farið MEÐ vindáttinni. Geri ráð fyrir að 100 metra fjarlægð dygði minnst ef maður nálgaðist kamarinn undan vindi. Og þarna stóðu 5-10 rútur uppfullar af túrhestum að skoða náttúruundrið. Hversu margir með niðurgang, veit ég ekki. 

Svo áðan rakst ég á þetta í tölvupósti frá einhverju útrásarliði:"Iceland is one of the most pristine and magical places on our planet."

Allavega, sko, þá er náttúran tignarleg og stundum ógurlega mikil viðureignar.

Dettifossvegur eystri lélegur

Er þetta frétt?

Maður bara spyr.

Er þetta ekki frétta-kækur með að birta hugsanalaust hækkanir eða lækkanir á erlendum fjármálamarkaði? Ef menn vilja grafa upp fréttir um fjármálastöðu samfélaga þá er af nógu gagnlegu að taka og það eru ýmsar fréttir í þeim geiranum. En svona fréttir eru eins og að segja að hitastig í New York hafi hækkað. Og við nánari athugun hækkaði það úr 17 í 18 gráður. 

Segi að þetta sé ekki frétt. 

Wall Street byrjar í plús

Einkavæðingin leysir allan vanda.

Stærsta svikamál Evrópu. Vá og já til hamingju með nýja titilinn!

Ríkið er vont og því ekki treystandi fyrir fjármunum. Heldur er betra að skipta ríkinu upp í parta og selja þá á tombólum til handa þröngum hóp kalla úti í bæ. Hjónin Hannes og Milton hafa verið að tyggja þetta eins og sálma úr trúarritum. Það hefur verið margra áratuga prógram að endurtaka þessa visku 10 sinnum fyrir svefninn og gera armbeygjur, fara í meikóver og lemja kommana í hausinn með bókinni Capitalism and Freedom 5 sinnum á dag, allavega. Og á bakvið þetta eru kallarnir úti í bæ að græða og skal engum koma á óvart spillingin sem skapast þegar fúlgur fjár eru annars vegar. Þeir eiga fjölmiðlana og míkrófóninn. Þeir hafa verið upphafðir sem hetjur Íslands þegar orðið "loddarar" á betur við. Samanburður á stöðunni með Berlusconi væri áhugaverður, á Íslandi er þröngur hópur valdafíkla, á Ítalíu er einn leiðtogi. Kannski.

Maður er minnugur þess hvernig síminn var seldur svona köllum úti í bæ og byggt var þetta flotta hátæknisjúkrahús fyrir seðlana.  Þarna stendur það tilbúið að redda mannslífunum eins og glæsileg föt keisarans í sögu HC Andersen. Hvers vegna byggja annað slíkt í einkavæðingarþokunni þegar þegar er búið að byggja svona glansandi flott slot? Loforð er jú loforð.

Ég man að fyrir 1-2 árum þegar Danir vöruðu við aðstæðum í bankakerfinu Íslenska, þá voru þeir fífl og vitleysingar þessir andskotans Danir. Hver skyldi hafa staðið á bakvið þann áróður? Eða var það meðvirkni bullukollahjónakornanna Hannesi og Milton? 

Stærsta svikamál frá stríðinu

36 milljarðar á ári í endurgreiðslu bara á vöxtum

Er það rétt reiknað hjá mér?

5.5% af 650 milljörðum

Svona sirka eitt tónlistarhús á ári, bara í vexti, svo eftir 7 ár miklu meira. 

Svo eru menn enn að tala um að einkavæða bankana aftur. 

Engin Icesave-greiðsla í 7 ár

Þegar skynsemin bregst er alltaf hægt að beita persónulegum aðfinnslum.

Það gengur auðvitað ekki að verið sé að atast í persónulegum líkamsmálum manns sem hefur oft verið mun lógískari en svo margir af þeim sem vilja fá að ráða. Tökum sem dæmi þá "skynsamari" sem vildu flugvöllinn burt. Ég held nefnilega að bakvið grímurnar sé oft annar heimur þar sem peningasýki, valdasýki og stjórnunarfíkn. Ekki vegna almenningsheilla eða af því húmorinn í skaupinu sé einlægur og hlutlaus.

Pælið augnablik í því ef Vatnsmýrin væri eitt drullusvað í dag, minnisvarði braskaratímabils með ókláruðum byggingum og draugahverfi um ókomna framtíð. Það væri þá glæsilegt að nota óhagkvæmnina við að þurfa að keyra til Keflavíkur í annars stutt innanlandsflug vegna skilningsleysis meðhlægjenda og gróðafíkla. Já það væri aldeilis svoldið klikkað.

Pælið í ef skuggahverfið með ljótu háhýsunum hefði fengið að færast alveg upp að og upp fyrir Laugaveg. Það hefði átt sér stað eyðilegging menningarverðmæta sem væri verri en að brenna bókasafn á áramótabrennu. Nei það er ekki virðing fyrir sögu landsins sem drífur menn í að rífa gömlu "kofana" heldur er það verknaður þeirra sem vilja ekki sjá eða geta ekki séð mikilvægi byggðasögu Íslands.

Hér í er falinn munurinn á Ólafi nafna mínum og svo "hinum."

Ég held að flestir í dag sjái loksins þvílíkt froðusnakk "verðmætin í Vatnsmýri" var.  Dæmigert bólu-bull sem ekki gekk upp frekar en píramídafjárfestingar ákveðinna hringa sem bjuggu til eigin verðmæti með hókus pókus bókhalds- og viðskiptatrixum. Þetta eru fletir á sama vandamálaforminu. Meðvirknin slík að átti að stífla Skerjafjörðinn fyrir "verðmætt byggingarland." Svoldið klikkað, já. Óneitanlega.

Þeiir sem voru hvað harðastir í að agitera fyrir flutningi vallar 50 km út fyrir borgina hafa fengið sig dæmda svoldið ógilda með tímanum. Við skulum ekki segja nein nöfn, enda er Dagsatt að þeir og þær eru viðkvæmar sálir líka þó þeir séu einhvers staðar í LA-LA landi eða úti að aka.

Segir af sér sem varamaður

Ruglustrumpar á erlendum æsifréttamiðlum teknir alvarlega?

Hvernig í ósköpunum er hægt að bera saman grísaflensu og spænsku veikina? Jú jú það er í lagi að bera saman en í samanburði verða menn að sjá hvor eitthvað sé sameiginlegt. Og þó hægt sé að finna eitthvað eru hér gerólíkir hlutir á ferð. Spænska veikin var mannlegur harmleikur á stærðargráðu sem erfitt er að skilja fyrir ofverndaða iPod-kynslóð. Grísapestin hefur ekki einu sinni þróast í neitt í samanburði við venjulegar flensur sem árlega draga til dauða tugþúsundir bara í Bandaríkjunum einum saman. 

Það er ljóst að svínapestin er fréttaæsingur þar sem almenningshræðslu og frétt þarf að fylgja ákveðin ábyrgð. Manni er spurn hvers vegna verið er að hræða fólk? Er verið að gera eitthvað annað á bakvið tjöldin og fela það með svona ruglustrumpafréttum? Eða er þetta taugaveiklun á samfélags-stærðargráðu? Egyptar farga öllum svínum í landinu, greinilega alþjóðleg klikkun í gangi sem á ekkert skylt við raunveruleikann frekar en stór hluti af því rusli sem er ausið yfir fólk úr sjónvarpsrásum og auglýsingasorpi. 

Ég er enn á því að svona fréttir eigi að fara töluvert í gegnum landlækni, sem á að getað skilið hysmið frá kjarnanum. Fólk á Íslandi má nú reyna að vera betur meðvitað um hvað er í gangi og fá upplýsingarnar frá fagfólki frekar en copypeisturum og meðvirkum þýðingarvélum.

Svínaflensan borin saman við spænsku veikina 1918

Heimsendir að koma

Þegar gúrkutíð er í fréttamennsku og núið skýtur rótum í daglegum leiðindum er alltaf hægt að grípa til æsifrétta um að heimsendir sé í nánd.

Man eftir fréttamannaefni í sjoppu-strætóskýlinu. Hann átti til að kalla "Strætó!" og svo bætti hann við með lægri röddu "...er ekki að koma." Hann fékk skólatösku í hausinn en glotti og svo hlógu allir með. Sem betur fer var strætó ekki kominn og þá var að halda áfram að hlægja og háma í sig nammi.

Þar fyrir utan held ég að þessi "frétt" sé nú aðallega auglýsing fyrir eitthvað fyrirtæki að reyna að selja grímur. Fréttin sem slík er þannig gríma og búið að mála skrattann á hana. 

Kaupa rykgrímur og spritt

Gæludýr

Það hefði verið búbót fyrir Vestmannaeyinga að geta haft keikó í höfninni og laða að túrhesta og börn. Það gengur ekki að sleppa gæludýrum út í náttúruna.

„Rangt að frelsa Keikó"

Siðferðileg hnignun.

Nú veit ég ekki hvers lags aragrúa af Amerískum blöðum ég hef verið áskrifandi að, en það er í raun bara eitt blað sem ég hef haldið mig við sl. 5 ár.

Hef sagt upp áskrift af New Yortk Times 3x í gegnum árin, Washington Post sagt upp líka, USA Today er drasl og eilífar tilvitnanir í New York Post er einkenni á þessum algerum skorti á gagnrýni á þessa auglýsinga- og stríðsáróðurs-ruslmiðla sem flest blöðin eru.  Það er alveg út í hött að kaupa þykt blað dýrum dómum þegar stærstur hluti þess er auglýsingasorp. Ef hægt væri að fá blöðin án auglýsinga þá tæki ég í mál að vera áskrifandi, en að kaupa auglýsingar er bara eitthvað sem ég geri ekki. 

Engann skal undra að Bandarísk blöð eru á stóru hnignunarskeiði sem byrjaði fyrir daga netsins og hefur meira með peningagræðgi að gera en nokkuð annað. Heimting á fáránlega háum gróða á ári fyrir einhvern trúflokk "fjárfesta" er undirrót síðasta vandamálakaflans. Dæmisaga Aeops um Gullgæsina er sjálfsagt torskilin fyrir þá sem þjást af græðgisýkinni, en ætti að vera fyrsta og síðasta kennslubókin í öllum viðskiptaskólum.

Og svo má byrja á því að setja blöðin aftur í hendurnar á alvöru blaðamönnum.

Enn minnkar upplag bandarískra blaða

Þorlákshöfn og Selfoss líka

Á hringferð um landið geri ég ráð fyrir að fara til eyja -eftir að Landeyjahöfnin er komin. Þarna er loksins stutt sigling yfir og þó vera megi að brim þarna geti verið kraftmikið er maður ekki að gera ráð fyrir að fara þarna yfir á korktappa. Jafnvel þó Herjólfur sé ágætt skip og leiðin til Þorlákshafnar sé betri upp á sjólag, skv póstum á mbloggi og annars staðar, þá er hún löng og oft út úr korti fyrir þá sem hug hafa á að fara til eyja. 

Óska Vestmannaeyjingum fyrirfram til hamingju með þessa höfn, vonandi verða ekki of margir dagar ófærir. Mig grunar að aðsókn ferðamanna muni aukast til muna, sem hlýtur að vera jákvætt fyrir alla. 

Og þó -ég hef áhyggjur af velferð Þorlákshafnar. Það er klárt mál að Herjólfur er burðarbiti í því samfélagi og Herjólfur á burt þýðir að Þorlákshöfn þarf á breyttum áherslum að halda. Eins og ég hef bloggað um með Selfoss og fyrirhugaða tilfærslu brúar út fyrir bæinn, þá er fólksflæði beint í gegnum staði lykillinn að velferð þeirra.

Við getum því gert ráð fyrir breyttum áherslum í tilvistar(vanda)málum tveggja bæja á þessu svæði á næstu áratugum.

 

Ferjuhöfn undirbúin

Gull í Sördt$ý

"Til þess eru gestir að græða á þeim." Svo heyri ég túristabraskara mæla. Aeops myndi snúa sér við í gröfinni.

 Svo ég ákvað að skapa þessar myndir fyrir ykkur. Flottar?

Guðmundur Óli Scheving bloggari segir takmarkið vera hótel í Sördtsý. Og já, af hverju ekki? Það hlýtur að verða eftirsótt verkefni meðal byggingarmeistara.

Surtsey er ennþá jómfrú og þegar byrjað verður að hleypa túrhestum upp á hana er ekki aftur snúið, mikið vill meira, gígurinn bíður! Það verður þó ekki á hvers manns færi að fara til eyjunnar, heldur útvöldum hóp. Kannski sjálfsútvöldum 100 manna hóp af því hann er með monný. En ekki þér, sem var heldur ekki boðið í partí með popparanum Elton John.

Ég geri ráð fyrir að strax frá byrjun verði grænna kringum skítakamarinn en annars staðar á eyjunni. Þá segja menn nóg komið og við hin fáum loks að komast upp á hina gylltu Mön.

 Það er nauðsynlegt að virkja gæði landsins innan ákveðinna marka og mér nægir alveg að fara í bát í salíbunu umhverfis eyjuna.

Málið er að hafa hlutina einfalda og eðlilega. Surtsey er friðuð og má vera það næstu kynslóðir, jafnvel þó gullið sem verið er að lofa finnist þarna í einhverri gjótunni...

Svo á meðan vísindamenn, á borð við líffræðinga og jarðfræðinga, fá að skrá breytingar í Surtsey má bjóða fólk velkomið til Vestmannaeyja með sprangi og ýsu með kartöflum á eðlilegu verði heimamanna. Og svo sigla kringum þetta djásn náttúrunnar sem má ekki snerta. Já það er óneitanlega sérstakara og sýnir meiri virðingu gagnvart þessari nýfæddu dóttur Vestmannaeyjaklasans.

Vill fá að flytja ferðamenn í Surtsey

Rétt yfirlýsing.

Frelsi blaðamanna til að rannsaka tiltekin mál hljóta að vera ein undirstaða aðhalds við lýðræði í landinu.  Og að maður geti tekið mark á blaðagreinum.

Höft á frelsi blaðamanna í svo stóru máli eins og hruninu sl. haust hljóta að teljast undarleg tilviljun.  Bankaleynd er ekki bara bankaleynd, heldur peningaleynd. Verið er að fela peninga frá almenningssjónum, sem í venjulegu árferði er eðlilegt að stóru leyti. En á tímum rannsókna á spilaborgum fjárglæframanna og stórfelldra efnahagsþrenginga ber að svipta þeim hulum sem þarf.

Soddan er det.

Undrandi á forgangsröðun FME

Frjáls markaður...

...er útópía.

Mín langvarandi skoðun sem styrkist með aldrinum.

Hef því ekki meira um þetta að segja. 

Olíufélögin skaðabótaskyld

Dóttirin er ekki faðirinn

Dæmigerð rugl frétt. Dóttir Joe Bidens er fíkniefnasjúklingur og þá er það notað í áróðursskyni til að reyna að sverta/stjórna manninn. Sagt er að myndband með henni að fá sér í nebbann hafi verið boðið New York Post, en gleymdist að segja að New York Post er ómerkilegur skítasnepill í eigu Murdoch, trompetblásara sjálfs andskotans fyrir Íraksinnrásinni.

Ég er enginn sérstakur stuðningsmaður Joseph Bidens. En réttara væri að segja eins og er að þetta er ómerkileg smáfrétt, þetta með að dóttir hans sé fíkniefnasjúklingur og þurfi að fá ráðgjöf eða fara í meðferð.

Á meðan talar Rupert Murdoch-fasistinn auðvitað ekkert um að 2% barna í Bandaríkjunum eru heimilislaus. 

Það hentar ekki þeim útrásar-og sjálftökusjúklingum sem hann þjónar, í beinu mótvægi við þarfir lesenda sinna hér í Bandaríkjunum. Nú er Obama stjórnin að undirbúa auknar herferðir í Afghanistan og með sama framhaldi munu þær enda með ósköpum á stærðargráðu sem fæst okkar gera okkur grein fyrir. Það má fastlega gera ráð fyrir að þung undiralda vopnaframleiðenda pressi á með þessar herferðir og að Murdoch sé einn af þeim sinnusjúklingum sem eru að míga í kvöldsúpuna okkar allra af því vinir hans græða einhvern veginn á því.

M.ö.o. gott að geta "þrýst á varaforsetann" ef hann hlýðir ekki, og um að gera að nota til þess lúalegar aðferðir sem flestir sjá ekki í gegnum. Aðferðir sækópata sem stjórna miklu.

(MBL "Myndband sem sagt er sýna Ashley Biden, dóttur John Biden varaforseta Bandaríkjanna, neyta kókaíns er nú til sölu. Hefur myndbandið m.a. verið boðið blaðinu The New York Post")

Ashley Biden mynduð við kókaínneyslu

Bull?

Mikið hefur verið skrifað um það hér í BNA að umskurður dragi úr HIV smiti. 

Langstærstur hluti Bandarískra karlmanna er umskorinn.

Næstum allir Svíar eru ekki umskornir.

Ég sló þessu upp og fann að HIVsmit er SEX sinnum  hærra í Bandaríkjunum en Svíþjóð.  

Hvað segir það okkur? Jú að lítið dugar að fara að skera hluta kynfæra undan smábörnum til að laga AIDS.

Mig grunar að þeir sem agiteri fyrir þessu séu að réttlæta umskurði í eigin heimahúsum sem til komu vegna trúarsannfæringar eða öðrum gömlum kreddum. 

Því það gæti vel verið að dugi jafnvel að leggja mönnum til að ÞVO sér vel milli ástvina. 

Hvað hina sjúkdómana varðar væri líka gott að sjá samanburð á Svíþjóð og Bandaríkjunum.

Bandaríkjamenn með umskurn á heilanum

Nú við hverju búist þið?

Á Íslandi virðast sumir halda að þeir geti staðið gegn almenningsáliti í heiminum.

99% vesturlandabúa telja rangt að veiða hval og munu bregðast við samkvæmt því. Akkúrat enginn mun tala málstað Íslands í hvalveiðum og því er skynsamlegt að haga sér svolítið eftir leikreglum alþjóðasamfélagsins. Og þó, kannski munu einhverjir Norðmenn og Japanir taka undir ákvörðun um hvalveiðarnar. Á Ensku er gamall frasi sem segir "Be careful what you wish for."

Í raun er þessi ákvörðun Whole Foods bara smá úði miðað við þá holskeflu sem gæti hæglega komið að utan. Ég er hissa á að ekki hafi verið gert meira í að berjast gegn hvalveiðum Íslendinga. Almenningur erlendis ber mun meiri virðingu fyrir Greenpeace en hvalveiðatilburðum Íslendinga, svo mikið er víst! Það þarf ekki mikið til að fá almenning upp á móti Íslendingum, nokkrir vel gerðir tölvupóstar myndu duga til að stórir hópar sneiddu framhjá íslenskum vörum. 

Ekki dygði að senda út karlakór í jakkafötum til að bæta skaðann!

Þangað til almenningsálitð hefur breyst er borin von að almenningur virði þessa hvalveiðiákvörðun. Smá stopp á kaupum fiskiafurða er nóg til að strika út allann fræðilegann gróða af hvalveiðum og það margfalt. Kannski er það stoltsins virði.

Bendi á að Whole Foods, sem rekur hátt í 300 búðir í Bandaríkjunum, tekur þessa ákvörðun af því það fellur í kramið hjá kúnnum, gæti þess vegna verið vegna þrýstings frá viðskiptavinum.

Þó finnst mér hvalkjetið bara ágætt, verð bara að segja það!

Hætta að kynna íslenskar vörur

Friedmann heilaþvotturinn, 3967 kafli.

Síðasta áratug hefur verið í gangi mikill heilaþvottur og endalaus bullubunugangur með að fyrirtæki séu heilagar kýr og að markaðurinn sé betri vinur en sjálfur Jesú, bara heiðarlegur vinur í leiðréttingum. Blöðin uppfull af bulli um markaðsfréttir, "vinur okkar" að hækka um 0,01% eða lækka um sama, fyrirtæki seld og kynnt eins og mikill hetjuskapur sé stundaður eða það skipti máli. 

Þetta er auðvitað einkenni á firringu oig heilaþvotti og græðgisfíkn. 

Talað er eins og fylgja eigi markaðnum, frekar en það sem skynsamlegt fólk myndi segja að stjórna þurfi markaðnum. Þjóðfélag sem er gott og fylgir markaðsprinsippum til hins ítrasta er ekki til, er útópía rétt eins og kommúnismi Sovét fyrrum.

Þjóðfélagið er miklu flóknara en einhverjar markaðskenningar.

Afnám reglugerða setur þjóðfélag á hausinn, rétt eins og ef engin lög væru í landinu þá kæmi skálmöld. Þetta virðast menn á borð við Hannes Hólmstein ofl trúboðar Friedmanismans ekki skilja. Sami er að blogga á blog.is en þorir ekki að leyfa umsagnir af ótta við að sannleikurinn birtist.

Staðreyndin er að fyrirtæki eru bara tól manna til að halda utan um ákveðinn rekstur. Góð fyrirtæki stunda framleiðslu þar sem heildarsýn skiptir öllu máli. Þar sem skúringatæknir fær virðingu og að lítið bil sé þarna á milli hans og forstjórans, að hugsað sé til langs tíma og að heilsteypt og viti borin skynsemi geti þjónað öllum þáttum innra og ytra sem fyrirtækið kemur að. Léleg fyrirtæki eru sem dæmi þau sem eingöngu eru gerð til að svala gróðafíkn utanaðkomandi einstaklinga sem helst ættu að flytja til Las Vegas. Staðreyndin er að "fyrirtæki" sem slíkt á ekki að hafa nein forréttindi og því eru röksemdir viðskipta-öfgamanna furðulega barnalegar í tilraunum til að réttlæta það sem oft er bara brask.

Fyrirtæki þurfa nefnilega aðhald rétt eins og börn í uppeldi. Að tala um að "sverta fyrirtæki" er í augum braskaranna and-auglýsingar. En í augum venjulegs fólks er það bara gagnrýni. Er ekki komið nóg af einhæfu talivarðandi fyrirtækin? Eru menn ennþá að velta sér uppúr að ekki eigi að leyfa að gagnrýna fyrirtæki? 

Hver er munurinn á þessum hugsanahætti og að vilja banna að tala neikvætt um formann Maó? 

Vitleysingurinn sem allir fylgdu í humátt á eftir eins og jarmandi rollur á leið í sláturhús, Milton Friedmann, sagði jú sjálfur að fyrirtæki hefðu enga samfélagslega ábyrgð. Þetta sýna fyrirtæki, þar sem forréttindastétt hlutabréfaeigenda eru rétthærri en almennur verkamaður. Ef arður er í fyrirtæki á að skipta honum milli þess að setja hluta sem sparnað fyrirtækisins í banka, og hinn milli fólks í fyrirtækinu og þeirra sem eru utanaðkomandi með hlutabréfaeignir. Ójafnt fyrirtæki er ekki gott fyrirtæki og á skilið sterka gagnrýni. 

Ég hef áður skrifað að HB Grandi hlýtur að sjá villur síns vegar ef rétt er sem haldið er fram un fyrirtækið. Annars hljóta þeir að skýra út sitt mál. 

Spurning hins vinnandi manns hlýtur á endanum að vera: Til hvers vinna vel fyrir einhverja sem er sama um mann?  Þetta hefur marglagskipt neikvæð áhrif um allt. Ekki síst varðandi vinnusiðferði.

Atvinnurekendur reiðir Jóhönnu

Sammála um HB-Granda-siðleysi

Sammála ASÍ. HB-Grandi á ekki að greiða þennan arð á sama tíma og þeir standa ekki við umsamdar launahækkanir verkafólks. Ég hélt í einfeldni minni að HB-Grandi myndi sjá villur síns vegar og endurskoða sína ákvörðun. Það gengur auðvitað ekki að mismuna fólki svona, að bara borga þeim sem betur eru staddir og sleppa greiðslum til hinna launaminni.

Hvað annað er HB-Grandi þá með í pokahorninu sem mætti skoða? Þetta ber vott  um siðlaust hugarfar, rét eins og ASÍ segir.

Dagar hreins-arðs eru liðnir, það var aldrei vottur um gott fyrirtæki sem snerist einungis um arðgreiðslur til hluthafa. Gott fyrirtæki gerir meira en það.

Tillögur um arðgreiðslur verði dregnar til baka

Skrópandi alþingismenn á stelpuklóinu að reykja?

Þingmenn skrópa í þingsal.

Ef þetta væri alvöru skóli myndi fara svo að þeir væru reknir heim fyrir tossaskap. Spurning hvort ekki þurfi kennara með lista yfir alþingismennina til að stemma af hverjir mæta og hverjir ekki. Svo má vel draga alla slæma mætingu frá launum. Þetta er meðalið sem dugar á svona gríslinga, sem halda að rafmagnið komi bara út úr veggnum og pabbi kaupi svo nýtt kreditkort um leið og það gamla fyllist, eða að lán sé sama og tekjur. Svo þykir manni nú tilefni til að hringja í foreldrana og tilkynna þeim að þessir óþekktarormar eru út í sjoppu að reykja njóla. Eru þeir kannski að hangsa á stelpuklóinu?

 Ef þetta væri þjóðarskútan þá gæti hún verið að sökkva!! Eins gott að engin ábyrgð fylgi svona djobbi.

Hugsið ykkur ef þessir ormar bæru ábyrgð á einhverju!

Þingmenn mæta illa